oqallissaarut
Bloggeri: Bloggerip: Siumup namminiilivinniarnermik periaasia isornartorsiorpaa
- Aleqa Hammondip Dansk Folkepartiip nunanit allamiunut politikkianut eqqaanarpoq, Sermitsiaq.AG-mi bloggeri Juaaka Lyberth allappoq
- Siumut Maniitsumi ataatsimeersuaqqammerpoq, nunattalu siunissaa naleqqersorneqarsimalluni. Nunatta nammineq naalagaaffiulernissaanik isuma tusaannarlugu pissusissamisoorpoq isumaqatiginarlunilu. Ataatsimeersuarnermilli tusarliunneqartut Sermitsiaq nr. 24-mi atuaraanni inerniliussassaq tassaasorinarpoq nunatsinnik namminersortumik Siumup takorluugai aningaasartalersorneqanngitsuusut aamma ingasattajaartumik kinaassutsimik pingaartitsinertaqarsorinartut. Partiimi naalakkersuisuutitaqartumit tusarliussat taamaattut politikkikkut patajaanngissutsitut nunani allani paasineqartarput, nunatsinnullu aningaasaleerusussangaluartunik tunuarsimaartitsilertarlutik.
Sermitsiaq.AG-mi bloggeri Juaaka Lyberthip allaaserisani 'Naalagaaffinngornissamik Siumup takorluugai aningaasartaqanngillat'-imik qulequtserlugu aallartippaa nangillunilu:
- Aleqap isumaa Namminersorneq pillugu inatsimmut aamma FN-ip inuiannik nassuiaasarneranut aporaattutut ippoq. Aamma Dansk Folkepartiip nunanit allamiunut politikkianut eqqaanarpoq, ingasattajaartumik sumiuussutsimik pingaartitsinertaqartoq. Kiisalu saqqummiuttagai imminnut akerleriissutut ipput. Danmarkimik danskinillu saammaasseqateqarusuppoq, illuatugaatigulli naalagaaffigilerniakkamini inuit kisitsisilersorlugit immikkuutitaarniarniarunarlugit.