Borgemesteri isornartorsiuisoqarnerata kingorna: Ilinniartitsineq ukkataralugulu suaaruteqarpoq
Ombudsmandi Qeqertalimmi utoqqaat illuannut nakkutilliiartorluni pulaarnermi kingorna isornartorsiuivoq. Kommuni ilaatigut sulisunik ilinniartitsinikkut pissutsinik pitsanngorsaaniarluni ilungersuuteqarsimasoq, borgemesteri Ane Hansen (IA) oqarpoq. Akissarsiffiullu nalaani sulinngitsoortarnermut tunngatillugu ataatsimut iliuuseqartoqartariaqartoq, borgmesterip aamma suaarutigaa.
Qasigiannguani utoqqaat illuanni Qeersaat Illuanni Inatsisartut Ombudsmandiat misissuereerluni pissutsinik isornartorsiuivoq.
Ilaatigut utoqqaat illuanni najugaqartunut nalunaarsuinani pissaanermik atuisoqarsimanera isornartorsiorneqarpoq – ilaatigut najugaqartoq puigortunngorsimasoq, coronap tuniluunnerani tunillatsissimanermini inimini mattusimatinneqarsimavoq.
Ombudsmandip isornartorsiugai iluarsiniarlugit, ilaatigut sulisunik ilinniartitsinikkut kommuni sulissuteqarsimasoq, Qeqertalimmi borgmesteri, Ane Hansen (IA), Sermitsiaq.AG-mut oqarpoq.
Innuttaasup puigortunngorsimasup anitsaaliorneqarneranut tunngatillugu, nunarsuaq tamakkerlugu tuniluuttoqarnerani sulisut annertuumik tatineqarnerisa nalaani pisimasoq, Ane Hansenip eqqaasitsissutigaa:
Inatsimmik allanngortitsisoqarnissaanik Naalakkersuisut qinnuigigaat
- Ombudsmandimit taakkartorneqartut pitsanngorsarniarlugit annertuumik iliuuseqareerpugut, kisianni coronap nalaani pisimanera maluginiarneqartariaqarpoq, puigortunngorsimasullu aqunneqarsinnaanngitsut tunillatsissimasut qanoq iliuuseqarfigineqartarnissaat nalornissutigineqarpoq, Ane Hansen oqarpoq.
Najugaqartoq puigortoq anitsaaliorneqarsimasoq utoqqaat illuata toqqorsiviani najugaqartinneqarsimasoq, ombudsmandip nalunaarutaani atuarneqarsinnaavoq. Taanna ineeraq igalaaqartoq, innuttaasunut nalinginnaasumik oqilisaassinermut atorneqartartoq, Ane Hansenip oqaluttuaraa.
Suliarlu tunuliaqutigalugu inatsisip allanngorneqarnissaanik kissaateqarluni Naalakkersuisunut attaveqarsimalluni, borgmesterip ilanngullugu oqaatigaa. Utoqqaat illui innuttaasunut puigortunut, taakku oqartussaasui akuersippata gps-ilersuisinnaalernissaat kissaatigaa:
- Pingaartumik uagutsinnut avannaani najugaqartunut pisariaqarluinnarpoq. Utoqqaat innuttaasut puigortunngorsimasut oqorsaateqaratik anigaangata ulorianarsinnaasarpoq, Ane Hansen oqarpoq.
Akissarsiffimmi sulinngitsoortarneq pillugu suaarut
Ombudsmandip nalunaarusiaani utoqqaat illuanni sulisunik amigaateqartarneq ernumassutigineqarpoq.
Akissarsiffiup nalaaniunerusoq sulinngitsoortarneq pillugu iliuuseqartoqartariaqartoq kattuffinnut arlalinnut allagaqarsimalluni suaaruteqarsimalluni, Ane Hansenip oqaatigaa:
- Allat sulinngitsooraangata sulisut ulapittartut qajassuukkumavagut.
- Assersuutigalugu paasititsiniaanermik suleqatigiissuteqartariaqarpugut, tassami ajornartorsiut nuna tamakkerlugu akissarsiffiup nalaani atuuppoq, Ane Hansen oqarpoq.
Isornartorsiuineq akissuteqarfigigaa
Ombudsmandip isornartorsiuinerani kommunalbestyrelsimut ilaasortaq Aqqa Samuelsen (S) pissutsinik akuersaartoqarsinnaannginneraalluni isornartorsiuivoq.
- Suliffik toqqissisimanartoq pilersinniarlugu, aammalu sulisut piginnaasarluartut aalajaatsullu sulisorinissaannut kajumissuseqalersinniarlugit sullivimmi avatangiisit pillugit najoqqutassat pitsaasut pilersinniarlugit aqutsisooqatigiit pilersaarusiorluartariaqarput, Aqqa Samuelsen ilaatigut tusagassiuutinut nalunaarummi taama oqarpoq.
Kommuni ajornartorsiutit pimoorussilluni iliuuseqarfigisimagai, Ane Hansen isumaqarpoq.
- Suliffeqarfitsinni sanngiiffigut nukittorsarniarlugit suliaqartuaannarpugut, borgmesteri oqarpoq.