Borgmesteri ilinniartitsisut soraakaasimanerannut: Atuarfik Kilaaseeqqami ilinniartitsisussaaleqineq nutaajunngilaq
Aqutsisulunneq atuartullu ilinniartitsisunut nakuusertarnerat ilaatigut peqqutaallutik ilinniartitsisut 18-it ukiut marluk ingerlaneranni soraarput. Ajornartorsiut nutaajunngitsoq Qeqqata Kommuniani borgmesterip naqissuserpaa.
Atuarfik Kilaaseeqqami ilaatigut aqutsinerlunneq atuartullu ilinniartitsisunut timikkut tarnikkullu nakuusertarnerat pissutigalugit ilinniartitsisut 18-it soraarniuteqartut, Sermitsiaq.AG-mi sapaatip akunnerata siuliani allaaserineqarpoq. Qeqqata Kommuniani borgmesteri, Malik Berthelsen (S) sulianut ataasiakkaanut oqaaseqarsinnaannginnerarpoq.
- Persuttaasarnermut tunngatillugu ilisimasaqannginnama oqaaseqarfigisinaanngilara, Malik Berthelsen Sermitsiaq.AG-mut oqarpoq.
Atuarfik Kilaaseeqqamut tunngasut assut ajuusaarnarnerarpai, kiisalu angajoqqaat atuartuutimik taartaasartunik atuartinneqartarnerannut ernumassuteqarsimappata paasisinnaanerarlugit.
Ajornartorsiut nutaajunngilaq
Atuarfik Kilaaseeqqami pisortaagallartup sapaatip akunnerata siuliani nassuiaatigaa ilinniartitsisut soraartartut suna peqqutaanersoq oqaatigikkajunngikkaat. Oqaatigaluguli namminneq inuttut killiffitsit atukkatillu, illoqarfimmik sungiussisinnaannginneq, meeqqamik atuarnerat peqqinnerallu, peqqinnissartik, ilaquttatik, suliffik pilerigisaminni periarfissaqalerneq ilaalu ilanngullugit peqqutaasut.
Ilinniartitsisuusimasulli ilaasa allanik peqquteqarsimallutik Sermitsiaq.AG-mut oqaluttuaraat.
Atuarfik Kilaaseeqqami ajornartorsiutaasut borgmesterip maanna oqaluttuarai.
- Atuarfik Kilaaseeqqami ilinniartitsisussaaleqineq ippassaani aatsaat pilerani ukiuni arlalinni ajornartorsiutaasimavoq. Qularinngilaralu tamatumunnga atuarfiup ullutsinnut naleqqukkunnaarsimanera annertuumik pissutaaqataasimanissaa.
- Aqqutsinerlunnermut tunngatillugu oqaatigineqartut inunnut ataasiakkaanut tunngassuteqarmata oqaaseqarfigissanngilakka, taamaakkaluartoq sulisugut nersualaarusuppakka pisuni ilungersunartuni ataatsimoorlutik aaqqissutissanik ujartullutik piffissarujussuarmik ilungersorlutik sulimmata.
Atuarfik Kilaaseeqqami ajornartorsiutit aaqqiiviginiarlugit qinigaaffiup siulianili iliuuseqarsimallutik borgmesterip oqaluttuaraa.
- Aaqqiiviginiarlugu assigiinngitsunik qanoq iliuuseqarfigisarsimavarput, soorlu ilinniartitsisunut immikkut ajunngitsorsiaqartitsilluni atorfininnissamut neqerooruteqarnerit atuutilersissimavarput aammalu Maniitsumi ilinniarsimasunik atorfinitsitsinissaq Sisimiuniit ajornarnerunera pissutigalugu sulisunut nutaanik 12-innik Maniitsumi inissialiortitsisimalluta.
- Taakkua saniatigut atuarfimmi aqutsisunut, alloriarfinni aqutsisunut ilinniartitsisunullu avataaaniit siunnersortinik suleqateqarluta, aqutsinermut inerisaanermullu pikkorissaanerit annertuumik ingerlassimavagut, ullumikkullu Helene Berthelsen aamma Mitdlarak Lennert suleqatigalutigit ingerlallutigu.
Ilanngullugu oqaatigaa taakkua saniatigut Atuarfik Kilaaseeqqap tamakkiisumik iluarsartuunneqarnissaanut aningaasarpassuarnik immikkoortitsisimallutik. Taannalu piffissami qanittumi suliariumannittussarsiuunneqarluni aallartissaaq.