Borgmesteri qanoq akulikitsigisumik tikeraartarpa?
Qinigaaffik una aappaagut naammassissaaq. Borgmesterit kommuniminni illoqarfinni nunaqarfinnilu qanoq tikeraartigisarnersut qinigaaffik naammassingajalermat Sermitsiaq.AG paasiniaavoq. Borgmesterimiit borgmesterimut angalasarnerit assigiinngillat.
Borgmesterit kommuniminni qanoq takussaatigippat? Avannaata Kommuniani kommunalbestyrelsimi ilaasortaasimasup borgmesterini Uummannamut tikeraartarsimannginneranik isornartorsioreersorlu Sermitsiaq.AG kommuninut tamanut paasiniaavoq. Tassani paasiniarlugu borgmesterit kommuniminni innuttaasunut qanoq tikeraartigisarnersut paasiniarlugu.
Kommuni Kujalleq ulapaartumik borgmestereqarput
Nunatsinni kommunini kujasinnerpaami, Kommune Kujallermi borgmesteri tikeraagassaminik pingasunik illoqarfeqarpoq aqqalininnillu nunaqarfeqarluni.
Borgmesteri borgmesterinngoramili kommunimi nunaqarfiit tamaasa ukiumut ataasiarluni tikeraartarpai. Illoqarfinnilu pingasuusuni ukiumut minnerpaamik pingasoriarluni innuttaasunik ataatsimiisitsisarluni.
Stine Egede aamma paasissutissiivoq inoqarfiit pisariaqartitsigaangata qaaqqusigaangataluunniit tikeraartarsimallugit. Assersuutigalugu siorna 2023-imi tallimariarluni Nanortalimmiissimavoq Narsamiillunilu. Taanna naapertorlugu ukiup sinneranut angalanissaminut pilersaaruteqarluni, tassani kommunalbestyrelsimi ilaasortat tamaasa ilagalugit nunaqarfiit tamaasa tikeraassamaarpaat.
Kommune Qeqertalimmi borgmesteri kommunimini takussaasoq
Kommune Qeqertalik sisamanik illoqarfeqarpoq arfineq-pingasunillu nunaqarfeqarluni.
Qeqertarsiaq, Qasigiannguit Kangaarsuarlu 2021-imi marloriarlugit borgmesterimiit tikeraarneqarput. Tassani nunaqarfiit Attu, Niaqornaarsuk Ikamiullu aamma tikinneqarlutik. Siornaak 2022-imi Kangaatsiaq pingasoriarlugu tikeraarpaa, Qasigiannguit marloriarlugu tikeraarlugu ataasiarlunilu Qeqertarsuarmut tikeraarluni. Tassani nunaqarfiit Niaqornaarsuk Attulu aamma tikinneqartarlutik.
Borgmesteri Ane Hansen siorna 2023-imi ulapissimavoq. Tassani illoqarfiit tamaasa tikippai, nunaqarfiillu Kangerluk minillugu angalasimalluni. Angallanniarnerup ajornakusoorsimanera peqqutaalluni Kangerluk tikinneqarsimanngilaq.
Ane Hanseni oqaluttuarpoq illoqarfinnut nunaqarfinnullu angalanini qassiunersut kisinniarlugit assiliivimini kisitsisariaqarsimalluni.
Ittoqqortoormiit suli tikeraarneqanngilaq
Kommuneqarfik Sermersuumi borgmesterip Avaaraq Olsenip kommunimini illoqarfiit sisamat nunaqarfiillu arfineq-pingasut tikeraagassarai. Taanna juunip ulluisa 15-anni 2022-imi borgmesterinngorpoq. Borgmesterinngornermi kingorna nunaqarfiit illoqarfiillu amerlanerit tikissimavai.
Kapisillit, Paamiut, Arsuk, Tasiilaq, Kuummiut, Kulusuk, Sermiligaaq, Tiniteqilaaq og Isortoq borgmesterip siorna 2023-imi tikeraarpai. Ittoqqortoormiit sila peqqutaalluni tikinneqanngilaq.
Malik Berthelsenip Itilleq suli tikeraanngilaa
Taamaakkaluartoq Qeqqata Kommuniani borgmesteri Maniitsumi Kangerlussuarmilu takussaavoq, ukiummi pingasut ingerlaneranni Maniitsoq arfinileriarlugu tikeraarpaa, Kangerlussuaq tallimariarlugu tikeraarsimallugu. Taanna naapertorlugu nunaqarfiit ataasiarlugit tikeraarsimavai, Itillerli suli tikissimanagu oqaatigaa, aasaruli tikeraarnissani naatsorsuutigaa.
Qeqqata Kommunia marlunnik illoqarfeqarpoq arfinilinnillu nunaqarfeqarluni.
Avannaata Kommuniani borgmesterip inoqarfiit tikikkuminaatsippai
Avannaata Kommuniani borgmesterip inoqarfiit 27-it tikitassarai. Tassani illoqarfiit sisamaallutik sinnerilu 32-it nunaqarfiullutik.
Avannaata Kommuniani kommunalbestyrelsimi ilaasortaasimasup borgmesteri uani qinigaaffimmi ataasiaannaluni Uummannamiissimanera, nunaqarfinnullu tikeraarsimannginnera isornartorsiorpaa. Tamanna borgmesterip nassuterutigaa, nassuiaatigalugulu COVID-19 aningaasaqarnermilu ajornartorsiutit tikeraarsimannginnermilu patsisaasut.
Avannaata Kommuniata nittartagaani takuneqarsinnaavoq borgmesteri 2021-imi ataasiarluni Uummannamiissimasoq Upernavimmiissimallunilu. Siornalu 2023-imi Qaanaaq tikeraarpaa
Avannaata Kommuniani borgmesteri nunani allani aamma takussaasoq
Odensemi Kalaallit Illuat suleqatigalugu Avannaata Kommuniani borgmesteri Odensemi innuttaasunik siorna novembarimi ataatsimiisitsivoq. Tassani Kalaallit Nunaanni kommunimik aqutsiniarnerup qanoq unamminartigisinnaanera innuttaasunut paasititsiniutigineqarluni.
Palle Jerimiassen aamma paasisassarsiorluni Schweizimiippoq. Tassani Aatsitassanut, Inatsisit Atuutsinneqarnerannut Naalakkersuisoq peqatigalugu qaqqat qajannaatsut pillugit schwiezit ujarassiuut misilittagaat paasisassarsiorfigalugit angalaqatigiipput.