Borgmesteri sakkortuumik isornartorsiuisoq: Eqqakkanik maannakkut ikuallaarusuppugut!

Avannaata Kommunia Uummannap eqqaavissuani ammasumik ikuallaanissamut akuersissummik qinnuteqarsimavoq, eqqakkat qaleriiaanneranni niviukkat tipersuarlu illoqarfimmut akornutaapput. Avannaani illoqarfinni nunaqarfinnilu arlalinni aamma taamatut inissisimasoqartoq, borgmesteri Palle Jerimiassen oqaluttuarpoq.

Namminersorlutik Oqartussat qinnuteqaammik suliarinnileruttorput, suliaqarneralli arriipallaartoq, taanna isumaqarpoq:

- Eqqakkanik maannakkut ikuallaarusuppugut. Eqqakkat qaleriiaanneranni niviukkat allallu nuanniitsumik atugaqartitsinerat pillugu naammagittaalliuuterpassuarnik tigusaqartarpugut. Tamanna Uummannamiinnaq ajornartorsiutaanngilaq, nunaqarfinni aalisakkanik tunisassiorfiusuni eqqagarpassuit aamma ajornartorsiutaapput, Palle Jerimiassen oqarpoq.

Avatangiisinut naalakkersuisup Kalistat Lundip (IA) allakkatigut akissuteqarluni ilisimatitsissutigaa, Naalakkersuisut avannaata kommunianit qinnuteqaat suliarileruttoraaat, aammali erseqqissaassutigaa akuersissuteqarnissamut piumasaqaatitaqartoq:

Aaqqiissuteqarnissaq piumasaqaataasoq

- Immikkut akuersissuteqarnermi ilaatigut piumasaqaatigineqartarpoq, kommunip immikkut akuersissuteqarfiup nalaani eqqakkanik isumaginninnissamut naammaginartumik aaqqiissutissarsiortarnissaa. Naalakkersuisut ammasumik ikuallaasarnerit piffissaq ungasinnerusoq eqqarsaatigalugu naammaginartumik aaqqiissutitut isiginngilaat, Kalistat Lund Inatsisartuni ilaasortamut Jens Kristian Therkelsenimut (S) allappoq.

Naalakkersuisup ilanngullugu innersuussutigaa, eqqagassaleriffiutileqatigiiffiup Esanip aasaq manna eqqakkanik poortorneqarsimasunik Kalaallit Nunaannit tamarmit aallartarnissamik neqeroorutaanik Avannaata Kommunia atuissasoq naatsorsuutigalugu.

Naalakkersuisulli oqaaqqissaarisariaqanngillat, kommunimimi eqqakkat iliuuseqarfigineqartarnissaannut pilersaaruteqartoqareersoq, borgmesteri oqarpoq:

- Poortuutissanik suli pisiaqarsimanngilagut, Tysklandimili poortuutissanik maannakkorpiaq misissuisoqarpugut.

Eqqagassalerinermi sulisussaaleqisoqartoq

- Kommunimi pilersaaruteqarpugut, eqqakkallu tamaasa poortoriarlugit kommuninut allanut Danmarkimulluunniit nassiuttarniarpavut, atortussalli pisariaqartinneqartut pissarsiarineqarnissaasa tungaanut eqqakkanik ikuallaasarnissamut akuerineqartariaqarpugut, Palle Jerimiassen oqarpoq.

Kommuni eqqakkanik ikuallaanissamut ukiuni kingullerni immikkut akuerineqartarsimavoq. Borgmesterip oqaatigaa, kommunip illoqarfiini sisamaasuni nunaqarfiinilu 21-usuni suliassat annertummata ajornartorsiutip aaqqiiffiginiarnera sivisussasoq. Tamatuma saniatigut eqqakkanik maannakkorpiaq isumaginnissinnaaneq sulisussaaleqinermit aporfeqartinneqartoq oqaatigaa.

Palle Jerimiassenip Esanimut ilanngunniarani nalunaaruteqarsimaneq kukkunerunnginnerarpaa kiisalu kommuni Esanimi suleqatigiinnermut peqataajunnaarami uninngaannarsimanngitsoq oqaatigalugu.

Aningaasat Esanimut allanullu atorneqartussaagaluartut kommunip illoqarfiini nunaqarfiinilu eqqakkanut aaqqiissutaasinnaasunut aningaasaliissutigineqarsimapput, borgmesteri tunngavilersuivoq:

Tissalukaarutinik pisiaqartoqarsimasoq

- Ilaatigut ti millioner koruunit Uummannami atorsimavagut, tassani eqqagassaleriffissamik illuliortitsisimavugut, aamma poortuutissaqarfiusussamik, taanna oqarpoq.

Esani eqqarsaatigalugu kommuni suleqatigiinnermut ilannguteqqissanersoq pillugu kommunalbestyrelsi ukiamut isummissaaq.

- Esanimut ilannguteqqissanerluta neriorsuisinnaanngilagut, taanna oqarpoq.

Eqqakkanik ikuallaanissamut akuerineqarnissatta tungaanut, tissalukaarutinik kommuni pisiaqarsimavoq, tissalukaarutit eqqakkani niviukkanik akiuiniarnermut atorneqartussaapput.