Borgmesterip oqallinneq aallarteqqippaa: Qaqortumi 1799 meterimik mittarfimmik maanna kissaateqartoq

Suliarinnittullu Pennecon maanna suliaminnik naamassinninnginnerini Qaqortumi mittarfissap tallineqarnissaa aalajangiunneqarli!

Kommune Kujallermi borgmesteri Stine Egede (IA), mittarfimmik 1799 meterisut takissusilimmik kissaateqartoq taama oqariartuuteqarpoq.

Mittarfiup takissusaa assortuussutaareerpoq, aatsaallu ukiakkut 2021-mi inaarutaasumik aalajangerneqarpoq, Inatsisartut tassani 1500 meterisut takissuseqarnissaa aalajangerpaa.

Naalakkersuisut misissuititsinerisa kingorna, mittarfimmi 1199 imaluunniit 1000 meterisut takissusilimmik mittarfiliortoqarpat inuiaqatigiinnut aningaasanik sipaaruteqartoqarnissaanik inerniliisoqareersorlu aalajangiisoqarpoq.

Borgmesteri Naalakkersuisunut saaffiginnittoq

Ataani takusassiami mittarfik 1500 meterisut takissusilik inuiaqatigiinnut 292 mio. kr.-nik akeqartitsissasoq naatsorsorneqarsimasoq takuneqarsinnaavoq.

Tallineqarnissaa qanoq akeqassanersoq misissortissimallugu, borgmesterip Stine Egedep tusagassiuutinut nalunaarummi oqaatigaa:

- (...) missingiutigineqartullu inornartorsuunnginneri paasinarmat Angallannermut Naalakkersuisumut saaffiginnissutigaara. Naalakkersuisup Qaqortumiinnerani, KAIR aamma aningaasaqarnermi ataatsimiititaliami partiit sinniisaasa peqataaffigisaannik Naalakkersuisoq ataatsimeeqatigaarput.

- Angallannermut Naalakkersuisup isuma paasilluarpaa, suliarlu angerlaallugu misissorumavaa, Stine Egede oqarpoq.

Suliaq misissortinniaraa

Qanoq akisunerutigissanersoq pillugu ilisimatinneqarnini Stine Egedep Sermitsiaq.AG-mut ilisimatitsissutigisinnaanagu oqaatigaa, qanoq akeqassanersoq suli misissorluaqqaarneqartariaqarmat.

- Kisitsisinik taasaqarnianngilanga, misissorluarneqaqqaartussaammat, Stine Egede oqarpoq. Suliarinnittut suli tassaniinneranni tallineqarnissaata ingerlaannaq suliarineqarneratigut aningaasanik sipaaruteqartoqarsinnaasoq, taanna isumaqarpoq:

- Isumaga naapertorlugu tamanna naapertuilluarneruvoq. Ukiuni qulinit 15-inut utaqqineq akikinnerulernavianngitsoq isumaqarpunga. Penneconip ingerlatitsiinnarnissaa soqutiginarpoq, tassami pilersaarut malippaat, qanoq iliornertik aamma ujaqqat qanoq ittuuneri ilisimavaat, Stine Egede oqarpoq.

Borgmesteri: Aatsitassarsiorneq aamma iluaqutsersinnaavaa

Takornariartut siunissami amerlineranni Nuummi mittarfimmi aporfeqartoqalersinnaanera ernumanartoq, aamma Kujataanit timmisartornerit toqqaannartut orniginarnerunissaat taassuma oqaatigaa:

- Mittarfik tallineqarpat timmisartoq toqqaannartumik Københavnimit tikissinnaalissaaq. Illuanullu aamma ajornannginnerulissaaq. Aammattaaq arlalinnik aallartilersunik aatsitassarsiorfeqarpugut – ukiut qulit qaangiuppata immaqa aatsitassarsiorfinni pingasunik sisamanilluunniit ingerlataqassaagut, borgmesteri oqarpoq, taassumalu aamma Air Greenlandip ukioq manna Narsarsuarmut ilaasoqarnerulersimanera innersuussutigaa.

Isumassarsiaq pillugu Naalakkersuisut eqqarsarnissamut maanna piffissaqartilaarniarlugit, Stine Egedep oqaatigaa.