Borgmesterit: Ataatsimoortumik angalatitsinerit akileraarusernagit
Corona Kalaallit Nunaanni takornariartitsisartunut ima ilungersunartorsiortitsitigivoq immikkut illuinnartumik iliuuseqartoqartariaqarluni, nunami borgmesterit tallimat ataatsimoorlutik Aningaasaqarnermut Naalakkersuisumut allagaqarsimasut taamatut isumaqarput.
Borgmesterit tallimaasut isumaqarput, sulinngiffeqarnermit Københavnimut akeqanngitsumik angalanissaraluit Kalaallit Nunaanni ataatsimoortumik angalatitsinermut allanngortinneqartariaqartut. Akiliunneqarlunis ulinngiffeqarnermi angalanerit aamma akileraaruserneqassanngitsut taakku isumaqarput.
Borgmesterit taamaalillutik Visit Greenlandimut sulisullu kattuffiinut arlalinnut isumaqataapput, taakkumi ilaasortamik Danmarki coronamik tuniluuffiummat Danmarkimukarnissartik allanngortinniarsarivaat.
Tunngavilersuutit tallimat
Borgmesterit Vittus Qujaukitsumut tallimanik tunngavilersuisimapput:
Kalaallit Nunaanni kaaviiaartitsisoqassaaq inuiaqatigiinnilu suliassaqartitsisoqarluni
Takornariartitsisartut ilaannut tamanna pisariaqartinneqarluinnartumik ikiuutaasinnaavoq
Akileraarutitaqanngitsumik Danmarkimut bilitsinnanneq aamma Kalaallit Nunaanni ataatsimoortumik angalatitsineq assigiinngissuteqarnersoq takusinnaanngilarput
Tamanna kalaallit siunissami nunatsinni kusanaqisumi sulinngiffeqartalernissaannut aallarniutaasinnaavoq. Taamaalilluni inuit ileqqaagarisimasaat nunani allani atorneqaratik nunai maani kaaviiaartinneqarsinnaanngussapput
Inuit nunanut allanut suliffeqariartorniartut tamatuma ikinnerulersissinnaavai, tassa timmisartorsuaq atlantikukkoortartoq ammanneqarniariartoq inuit mattussaaqqasinnaanertik ajornerpaamillu pisoqassappat covid19-imik Kalaallit Nunaannut eqqussisinnaanertik annilaanngatigingamikku.
Borgmesterit isumaqarput, ataatsimoortumik angalatitsinerit akitsuuserneqannginnissaat "aaqqissuussamut maanna atuuttumut ilassutaasut annikitsut, ajorluinnartumillu kinguneqartariaqanngitsut”.
- Pissutsit immikkut ittut immikkut ittunik aaqqiissutissarsineqartariaqarput, borgmesterit nunami aningaasaqarnermut naalakkersuisutut akisussaasumut allakkaminni naggasiillutik erseqqissaapput.