Borgmesterit Naalakkersuisullu: Aaqqissuussaanermut isumalioqatigiissitaq nutaaq pilersinneqassaaq
Sisamanngorneq 22. februar Ilulissani ataatsimiinneq annertooq ingerlanneqarpoq. Tassami nunatsinni borgmesterit Naalakkersuisullu politikkikkut ataqatigiissaarisoqatigiinni ataatsimeeqatigiipput. Ataatsimiinnermi aqutsisuusoq, nunamut namminermut naalakkersuisoq, siunnersuuteqarpoq isumalioqatigiissitamik nutaarluinnarmik pilersitsisoqassasoq, taanna kommunit katitigaanerannik nalilersuissaaq aammalu siunissami innuttaasunut tamatsinnut inuuneq qanoq pisariinnerulersinneqarsinnaanersoq siunnersuuteqassalluni.
Assit amerlanerusut takukkit assip siulliup ataani tikkuut aappaluttoq toorlugu.
Ataatsimut isigalugu nunatsinni borgmesterit Naalakkersuisullu tamaviaarlutik sullipput ulluinnarni innuttaasut inuunerannik pisariinnerulersitsiniarlutik. Borgmesterit kommunalbestyrelsit tunuliaqutaralugit naalakkersuisullu Inatsisartut tunuliaqutaralugit taakku piginnaatitsissuteqartitsinerisigut.
Politikkikkut ataqatigiissaarisoqatigiit suleqatigiiffiuvoq, nunatsinni atukkat, minnerusut annertuullu, politikkikkut qanoq aaqqissuussiffigineqarnissaannik oqalliffiullunilu siunniussanik tikkuusseqatigiiffiusartoq, tassa politikkikkut aalajangiisartutta sammivissanik ilusilersueqatigiittarfiat siunissamut qaninnerusumut aammalu siunissamut ungasinnerusumut tunngasuni.
Ilulissani ataatsimiinneq sisamanngornermi ingerlanneqartoq taakku ilagaat. Ataatsimiissutissammi annikinnerusut annertoorsuillu tamarmik oqaluuserineqarlutillu siunnerfissanik tikkuussiffiginiaqatigiiffiupput.
Sermitsiaq.AG-mit iluatsipparput oqaluuserisassat sukumiisumik nalunaarsorneqarsimasut takussallugit, taakkulu tamarmik politikkikkut siuttorisatsinnit naammassiniarneqaleruttorput.
Aaqqissuussaanermut isumalioqatigiissitaq pilersinneqangajalerpoq
Ataatsimiinnermi oqaluuserisassat qimerloornerini suliassaqarfik annertunerpaatut oqaatigineqarsinnaaqqooqisoq tassaavoq innuttaasorpassuit qanimut oqartussaaqatigiinnermik amigaateqarnerarlutik naammagittaalliutaat anigorniarlugu qanoq iliuuseqartoqarsinnaanera, naammaginninnginneq puttuttualernikuuvoq nunatsinni kommunit ataatsimut kattunneqarmatali, naammaginninnginnermullu pissutaasut annersaraat qanimut oqartussaaqatigiinnermik arsaagaasimasutut misigisimaneq.
Ataatsimut isigalugu nunatsinni sumiiffinni amerlasuuni ujartorneqartualeqqavoq sumiiffigisami aalajangiisartut qanittumiinnissaat, kilometerinillu hundredelikkaanik ungasissuseqannginnissaat, ullumikkummi oqartussaasut ungasittorujussuanngorsimaneragaasarput, iluatsitsilluni borgmesteri nunaqqatigisimanngikkaanni.
Maanna Nunamut Namminermut Naalakkersuisoq Jess Svane (S) suleqatigiissitaq peqatigisani sinnerlugu naammaginninngitsunut naapitseriaanertut isikkulimmik siunnerfeqartoqassasoq siunnersuuteqarpoq, taamaalilluni qanimut oqartussaaqatigiinnerup utertinneqarnissaanik piumasaqaat naaperiarneqarluni.
Taassumami siunnersuutigaa aaqqissuussaaneq pillugu isumalioqatigiissitamik nutaamik pilersitsisoqassasoq, isumalioqatigiissitap aaqqissuussaaneq massakkut atuuttoq nalilersussavaa aammalu pitsanngorsaataasinnaasunik siunnersuutinik siunnersuuteqassalluni.
- Aaqqissuussaaneq pillugu isumalioqatigiissitamik pilersitsisoqassaaq
- Inoqarfiit minnerusut kommunini toqqakkani immikkut aaqqissuussiffigineqarnissaat pilersinneqassaaq
- Aaqqissuussaaneq pillugu paasissutissanik siammarterinerusoqassaaq aammalu kommunalbestyrelsini qinikkat pikkorissarneqartarnerat annertusarneqassaaq
- Politikkikkut ataqatigiissaarisoqatigiit Sisimiuni februar 2023-mi ataatsimiinneranni aalajangiunneqarpoq suleqatigiissitamik pilersitsisoqassasoq, suleqatigiissitap taassuma suliassarissavaa kommunit aaqqissuussaanerat misissussallugu, suliassanik kommuninut nussuineq misissussallugu aammalu innuttaasunik kiffartuussiveqarneq misissuiffigissallugu. Taakku saniatigut aamma suleqatigiissitap misissussavaa, qanoq ilillutik Namminersorlutik Oqartussat nutaanik inatsisinik aalajangersaasoqarsimatillugu aalajangiunneqarsimatillugu kommunit atuutsitsinissaannik oqilisaassoqassasoq.
Suleqatigiissitap allaffissornikkut siunnersuutini PKG-mut tunniutissavaa, tassanilu ersarissarneqarsimassaaq suliassat qanoq pitsaanerusumik naammassiniarneqassanersut, tamatumalu kingorna politikkikkut isummersorfigineqarlutillu oqaluuserineqassapput, ilaatigut Jess Svane siunnersuummut tunngavilersuivoq.