Breivik: taamaalioqqissagaluarpunga
Ingasattajaarluni talerperliuniaq Anders Behring Breivik periarfissaqartuuguni pinerleeqqissagaluarpoq
Anders Behring Breivik siorna Oslomi naalakkersuisut allaffeqarfiata eqqaani qaartartumeerisoq inuusuttunillu aasarsiortarfimi naalakkersuinermut tunngatitami toqoraasoq peqqissiminngilaq.
Akerlianilli.
- Taamaalioqqissagaluarpung, ingasattajaarluni talerperliunisaq pinerliinermik unnerluutigineqartoq marlunngornermi ullaap tungaani Oslop eqqartuussiviani illersorniarluni oqalugiaammini oqarpoq, unnerluussinermik nipeqarnerusumik.
- Ukiuni untritilikkaani makkunani nunagisamik pingaartitsillunga kisimiillunga sakkulersorlunga iliuuserisani alutornarnerpaaq naammassisimavara, nangippoq.
Ingasattajaarluni talerperliuniap Breivikip allattukkat A4-t 13-iusut nakkuteqqissaarlugit toqqaannertumik atuarpai.
Læs også "Retten er sat: Breivik lavede højrehilsen"
Norgemi musliminut, marxistinut akuliunniarluni kultureqarniartunut tusagassiortunullu saassussinissamik kajumissaarivoq.
- Ajorniarumatooqarsimassappat tassaasimassapput akuliutamik kultureqarniartut. Norgemi Europami tupaallaataasussatuaavoq sooq siusinnerusukkut iliuuserisaq taama angitigisoq pisimannginnersoq. Suut tamarmik aagasaartumik kinguneqassapput, Breivik Norgemi NRK-mut oqarpoq.
Tassani aagasaaqisumik saassussinini eqqartorpaa siorna aasaami juulip ulluisa ilaanni inuit 77-t inuunerannik naleqartoq.
Toqutaasut amerlanerit Breivikip illuinnarsuutaanik aallaasianillu automatiskiusumit aallaaneqarlutik toqunneqarput, taakkumi politiitut atisaqarluni qeqertamut Utøyamut niunermini nassarpai, tassaniippullu Norgemi socialdemokraatit inuusuttai untritilikkaat.
- Tassaanngillat meeqqat peqqusersuitsut, 33-nik ukiulik Breivik oqarpoq, toqunanilu uppertussianngortitaasimasutut taallugit.
Allaat Hitlerip inuusuttaannut assersuuppai.
Breivikip oqalugiaataa tv-kut aallakaatinneqaqqusaanngilaq, tusagassiortorpassuilli eqqartuussivimmi pisunit allaaserisaqarsinnaapput.
Breivikip qinnutigisimavaa allakkiamik tigumiarnissani oqaatiginiakkani tamaasa oqaatigisinnaaniassagamigit, akuerineqarsimavorlu.
Tassani eqqarsaatersuuterpassuani allassimavai siusinnerusukkut isummaminik allassimasaanut assingullutik.