Brobergi akissutissarserusuttoq: Soooruna partiit urani pillugu innuttaasunik taasititserusunngitsut?
Naleqqameersup Pele Brobergip pingaartumik Siumukkunniit paaserusuppaa, sooq uranimik qalluisoqarnissaa pillugu innutaasunik taasitsitsisoqarnissaanik siunnersuuti oqaluuseritikkusunnginneraat. Siumumi siulittaasup Erik Jensenip isornartorsiut akerlilerpaa: - Sangujoraartumik polikkeqangilagut, taanna oqarpoq.
Uranimik qalluinissamut inerteqqut nutaaq siorna ukiakkut amerlanerussuteqalaartunit akuerineqarpoq. Naleqqami ilaasortat taamanikkut naalakkersuisuutitaqatigissatik IA-kkut peqatigalugit amerlanerussuteqalaarlutik akuersisuupput.
Naleqqami siulittaasup Pele Brobergip apeqqut qaqeqqissimavaa, uranimik qalluisoqassanersoq pillugu innuttaasunik taasititsisoqarnissaa pillugu inatsisissatut siunnersut aasaq tusarniaassutigingamiuk.
Siunnersuut oqaluuserisassanngortillugu piareerneqarsimavoq, Inatsisartulli Siulittaasoqarfianit aalajangerneqarsimavoq, siunnersuut ukiaq manna ataatsimiittoqarnerani suliarineqassanngitsoq.
Pele Brobergip tamanna ajuusaarutigaa, Sermitsiaq.AG-mullu oqaatigalugu, siunnersuutip suliarineqarnissaa suli sulissutigalugu, pingaartumillu Siumukkormiunit paaserusullugu, sooq siunnersuunni inersuarmi suliarneqarnissaanut peqataarusunnginnersut.
Qineqqusaarutaalersinnaanera pinngitsoortikkusunneqartoq
Pele Brobergip oqaatigaa, Siumup partiprogrammiani allassimasoq uranimik qalluisoqarnissaa anguniagaasoq, pineqartorlu pillugu innuttaasunik taasititsinissamut partii maanna periarfissaqartoq. Brobergip oqaatigaa, siunnersuut oqaluuserisassanngortinneqartoq amerlanerussuteqartunit akuerineqarsimappat oqaluuserineqartussaasoq:
- Siunnersuut oqaluuserisassanngortinneqartoq amerlanerussuteqartunit akuerineqarsimappat oqaluuserineqartussaavoq. Taamaammat Siumukkunnut saaffiginnissimavunga, partiprogrammianni allassimammat uranimik qalluisoqarnissaa anguniarneqartoq, Pele Broberg oqarpoq.
Naleqqami siulittaasup oqaatigaa, pingaarnertut anguniagaasoq, uranip tulliani qineqqusaartoqalerpat qineqqusaarutigineqarnissaata pinngitsoortinniarneqarnissaa:
- Naleqqamit kissaatigaarput, uranip qineqqusaarutigineqannginnissaa, innuttaasulli isumaat tusarusupparput. Ajoraluartumik Siumumiit maanna nalunaarutigineqarpoq, aatsitassarsiornermi suliffissuaqarfiit siunissami periarfissanik misissuisinneqartannginnissaat akuerineqarsimavoq, Pele Broberg oqarpoq.
Jensen: Siornali innuttaasunik taasisitsisoqarsinnaasimagaluarpoq
Siumumi siulittaasup Erik Jensenip Naleqqamit isornartorsiutigineqartoq isumaqatigineqanngilluinnarpaa:
- Siullertut oqaatigerusuppara, siorna ukiakkut Inatsisartut ataatsimiinneranni urani pillugu innuttaasunik taasisitsisoqarnissaa pillugu siunnersuut oqaluuserisassani normu 23-usoq Naleqqami ilaasortat namminneerlutik itigartitsissutigigaat, Erik Jensen oqarpoq.
Innersuussutigaa siorna ukiakkut uranip inerteqqutaalernissaanik siunnersuut suliarineqarmat, siunnersuutip innuttaasunut taasissutigineqarnissaanik siunnersuummik saqqummiussisoqarsimasoq, taannalu aamma oqaluuserineqarsimalluni. Taamaakkaluartorli inerteqquteqalernissamik siunenrsuut innuttaasunut taasisitseqqaarani Inatsisartuni Naleqqamit IA-millu akuerineqarsimalluni.
- Naaperiaasimavugut, partiitsinnilu periarfissat assigiinngitsut pillugit oqalliseqataanissamut piareersimalluta. Naleqqamit nammiunneerlutik innuttaasunik taasisitsisoqarnissaa itigartitsissuteqarput, maannalu ukiup affaa qaangiutiinnartoq, arlaannik iliuuseqarusunngitsutut isornartorsiorluta, tamanna Naleqqakkormiut namminneq akisussaaffigissavaat, Erik Jensen oqarpoq.
- Tutsuiginanngitsumik naalakkersuinermik ingerlatsinerussasoq
Siumumi siulittaasup aamma innersuussutigaa, Siumut IA-lu naalakkersuisooqatigiinnissamik isumaqatigiissuteqarmata, qinigaaffimmi matumani uranimut atatillugu apeqqut qaqinneqaqqissanngitsoq isumaqatigiissutigineqarsimasoq:
- Sangujoraartumik politikkeqanngilagut. Inatsisartuni amerlanerussuteqartut aalajangigaat ataqqivagut.
- Maanna tunngavigaarput, urani pillugu apeqqut innuttaasunit isummerfigineqarnissaa partiinut isummerfigitinnagu, tamannalu naalakkersuisooqatigiinnissamik isumaqatigiissummi atuarneqarsinnaavoq. Aamma innersuussutigissavara, Inatsisartut ulluinnarni ingerlatsinermi malittarissaat Siumumit ataqqillugillu malitappavut - tassa Inatsisartuni oqaluuserineqareerlutillu aalajangiiffigineqareersimasut qinigaaffimmi matumani qaqinneqaqqinnginnissaat pillugu isumaqatigiissut malipparput.
Pele Brobergip inatsisissatut siunnersuutaanut atatillugu qanoq ilusilersuisoqarnissaanut piumasaqaatit eqqarsaatigalugit siunnersuummut itigartitsissut Sermitsiaq.AG-mit takuneqarsinavoq. Inatsisartut Siulittaasoqarfianit allapput, siunnersuut "pisortatigoortumik akuerineqarsinnaaneranut killissaminiittoq" namminerlu Siulittaasoqarfimmit oqaluuserisassanut ilanngussisoqarnissaanik kissaarteqarnermik tunngaveqartoq. Siulittaasoqarfiup oqaluuserisassanngortinneqartoq itigartitsissutigisinnaallugu akuersissutigisinnaavaa.
Erik Jensenip erseqqissaassutigaa, Siumumit aatsitassanik piiaaneq nunami maani atugarissaarnerusoqalernissaanut isertitaqarnerulernissamullu periarfissatut tunngaviatigut isigineqartoq, piffissalli sivikitsut ingerlaneranni inatsimmik allannguisarneq aningaasaliissuteqar arttunut tutsuiginartutut isigineqaranilu tutsuiginanngitsumik naalakkersuinermik ingerlatsinerussassoq oqaatigaa.