tillinniartoqareersoq
Brugsenip tillinniat akiorniarpai
Nakkartitsivik dropbox atorlugu Brugsenip immikkoortoqarfiini Brugseneeqqani karsit aningaasanik ikittuinnarnik imaqartalissapput
Brugsenip immikkoortoqarfiini Brugseneeqqani dropboxit piffissami aalajangersimasumi parnaarsimasunik atortulerneqarput.
Tamanna pivoq augustip qaammataani aallaasersortumit Nuummi Brugseneeraq ujajaaffigineqareersoq. Aningaasanik ikittuinnarnik Brugseneeqqani uninngasuuteqartalernikkut tillinniarnissaq pilerinarunnaarsarniarneqarpoq.
Dropboksit tassaapput, aningaasanik toqqorsiviit ammarneqarsinnaanngitsut, aningaasanik karsip imaanik nakkaatitsivigineqarsinnaasut. Dropboksit nalunaaqutaqarput, piffissaq aalajangersimasoq taamaallaat ammarneqarsinnaallutik, Kalaallit Nunaanni Brugseni KNB nalunaarpoq.
- Aningaasivinik toqqorsivimmik matoqqasumik ikkussuivugut, KNB-imi kissaatigigatsigu pisisartut minnerunngitsumillu sulisuvut toqqissisimanerulernissaat. Tassami pingaaruteqarluinnarpoq, sulisut isumannaatsumik suliffeqarnissaat, Brugsenimi tuniniaanermut pisortaq Jan Foged Sørensen oqarpoq.
Brugsenip immikkoortoqarfiini allagartaliisoqassaaq dropbox atorneqartoq.
- Soorunami ujajaanissamut sakkortuumut 100 procentimik pinngitsoortitsinissaq angusinnaanngilarput. Siunissamili ujajaanissap pilerinarsinnaanera pakkersimaarsinnaavarput, karsimiittuutit aningaasat ikilisarlugit, Jan Foged Sørensen oqarpoq.
Brugsen Qaqortumi, Nuummi, Maniitsumi Sisimiunilu arfinilinnik immikkoortoqarfeqarpoq.