Bussinut siannguttut imaaginnavittut
Illoqarfiit pingaarnersaat silarlummit eqqugaavoq. Nuup Bussiini oqarasuaatit nipaarunneq ajorput. Suna naatsorsuutigisinnaanerlugu uani atuaruk
Silamiiffissaanngilaq. Illoqarfiit pingaarnersaanni massakkorpiaq ersinngitsuliortorsuuvoq.
Soorlu ullumi allaaserereeripput Nuup Bussii ingerlatsiviit silarlummit eqqukkat ilagaat. Bussinik ingerlatsivimmit bussit 1, 1A aamma 3 unitsinneqartariaqarsimapput.
Amerlasuunilli tamanna paasineqanngitsoorsimavoq.
- Oqarasuaatit siarngutiinnavipput ilaasorisartakkavut isumaqarput ingerlaarfiit tamaasa taamaatiinnarsimagivut. Allaaserisap qulequtaa taamaallaat atuaannarsimagunarpaat. Kisianni tassa timmisartoqarfiliartartut Qinngutsinnullu ingerlasartut uninngagallarput, René Hansen Nuup Bussiinit oqarpoq.
- Qaqugu angallasseqqilersinnaavisi?
- Maannamuugallartoq oqaatigiuminaappoq. Angalaarfiginarsippat ingerlaannaq aallaqqissaagut.
Ingerlatsinermut pisortaq René Hansen ilanngullugu erseqqissaatigaa Nuup Bussii sms-ikkut kiffartuussinermik ingerlatsimmata gsm-imik oqarasuaatilinnit atorneqarsinnaasoq. Taamaattumik aaqqissuussamut ilanngukkaanni ingerlatsinermi allanngortoqartillugu sms-ikkut ingerlaannaq nalunaarfigineqartarput. Ingerlatsiviup nittartagaani qanoq pisoqarnersoq malinnaaffigineqarsinnaavoq.