alutornarluinnartoq
Canadami arsarnerit kusarnarluinnartut alutorsaatigineqartut
Yellowknifemi North West Territoriesimiittumi arsarnerit immiunneqarsimasut nunarsuaq tamakkerlugu alutorineqarluarput. Ilisimatuup taama arsarneqartarnera qaqutigoornerarpaa.
Arsarnerit kusanarluinnartut David Yaumit immiunneqarsimasut facebookimi alutorsaatigineqalaavipput.
Taassama immiussaa 30.000-t sinnerlugit takuneqareersimavoq 700-nillu ikinnerunngitsunit siammarterneqarsimalluni.
- Unnuk taanna allaannginnami arsarnerit ammukaarfigigaannga. Unnunnit allanit arsarneqartarneraniit allaaneruggami, David Yau CBC Northimut oqarpoq.
Taanna Yellowknifemi ukiut 20-t najugaqarsimavoq arsarneqaraangallu malinnaasarluni.
- Allaannginnami uumasorujuup aqqarfigigaanga, nutaarsiassaqartitsivimmut oqarpoq.
Atuaruk: Assit: Arsarnerit nalissaqanngitsut
Taama arsarneqarnera qaqutigoortoq takuneqartareersimasorlu ilisimatuup oqaatigaa.
- Arsarnerit qorsuusut naqqani tunguusanngorlutik akuttusoorujussuarmik pisarpoq siornatigulli taamaattareerlutik, Eric Donovan Department of Physics and Astronomy ilisimatusarfiani Calgarymiittumi ilinniartitsisoq CBC Northimut oqarpoq.
Atuaruk: Assit: Arsarnerit nalissaqanngitsut
Pisarnermit aalanerupput
Elektronit arsarnernik qaammartitsisartut unnuk taanna sakkortunerusimammata arsarnerit taama appasitsigisumiissinnaasimasut nassuiarpaa.
Elektronimmi silaannarmut akulerukkaangamik 100-200 kilometerit akornannikkaangat arsarnerit qorsuusut takuneqarsinnaanngortarput.
Portussuserli 95 kilometerinngoraangat elektronillu kvælstofimut akulerukkaangata arsarnerit tunguusanngortarlutik.
Arsarnerit aappaluttut portussusaat ungasinnerupput, taakkumi 150-500 kilometerit akornini portussusilimmiittarmata.