Canadami orpippassuit ikuallannerinit pujoq kitaata sineriaaniippoq
Kitaata sineriaani innuttaasorpassuit pujorsunnittoqarnera aamma qilaap taarneranik ataasinngornermi ernumassuteqarput, ilaat qanittumi ikuallattoqarsimanersoq isumaliuteqarsimapput.
Nalinginnaanngitsumik pisoqarneranut pissutaasoq ungasittumit pisoq, Kalaallit Nunaanni Politiit aamma silasiortut saqqummiuppaat.
Kalaallit Nunaata Politiivini pigaartut pisortaat, Gedion Qvist, innuttaasunit pujorsunnittoqarnerani aamma kitaata sineriaani illoqarfinni arlalinni silaannaap tarrajunneranut ernumassuteqartunit arlalinnik nalunaarfigineqarsimallutik, Sermitsiaq.AG-mut ilisimatitsivoq.
Kalaallit Nunaanni qujanartumik ikuallattoqanngitsoq politiit oqaatigaat, kisianni inunnut pualluutilinnut pujoq akornutaasinnaanerarpaat.
Allaanngilaq nunarsuaq aserulersoq
Silasiortoq Anette Hartvig Nielsen Danmarkimi silasiorfimmeersup (DMI), Nuummiittup tupinnartorsiaq nassuiarpaa. Pujoq aamma silaannaap iseriannera Canadami maanna orpippassuit ikuallanneranneersuusoq, taanna nassuiaavoq.
- Ullaap tungaani sivisuumik taarpoq. Allaanngilaq nunarsuaq aserulersoq, Anette Hartvig Nielsen oqarpoq.
Taassuma nittartagaq fire.airnow.gov innersuuppaa, tassani qasertumik qalipaatillit avannaanit kujataanut Tasiilap tungaanut takuneqarsinnaapput.
Nalinginnaanngitsumik silaannaap ingerlaarnera putsumik arsakunillu ingerlaartitsisoq, anorimit qutsissumiittumit ingerlaartinneqarneranik nassuiaatissartaqarnerarpaa, taakku siullermik avannamut ingerlaarput, kingornalu kujammut kangimut sangullutik. Taamatut pisoqarnera ulluni tulliuttuni ingerlaannassasoq naatsorsuutigaa, kisianni silaannaap ingerlanera pingasunngornerup ingerlanerani allanngussasoq ilimanarnerarpaa.
DMI-mit upalungaarsimasut aamma politiit attaveqarfigineqarput, tassanilu silaannaq pillugu nalunaarusianik timmisartunut Dash-8-nut nunatsinni angalasunut nassiussisoqarpoq. Pujoq timmisartuussinernut toqqaannartumik ulorianartorsiortitsinngikkaluartoq, timmisartortartunit ilaasuniillu malugineqarpoq. Taamaammat timmisartortartut pissutsit allanngornerinut maluginiagaqassasut kaammattorneqarput, pujoq silaannarmiitilluni naamaneqarsinnaammat, tamannalu tunngavissaqanngitsumik ilaasunut ernumalersitsisinnaavoq, silasiortoq isumaqarpoq.
Innuttaasut pualluuteqartut akornutaasinnaasoq
Peqqikkaanni ulorianartoqanngilaq. Nakorsaaneq Henrik L. Hansen aamma Kommuneqarfik Sermersuumi upalungaarsimanermut pisortaq, Jes Damgaard Andersen nalunaaruteqarput.
Nunatsinni innuttaasut arlallit biilit aamma tummeqqat arsakunik nakkaaffigineqarsimasut nalunaarutigaat, apullu ullaaq manna qasertumik qalipaateqarnerarneqarpoq.
- Innuttaasut ataatsimut isigalugit putsumit Kalaallit Nunaat qulaallugu ingerlaartumit sunnerneqarnavianngillat. Kisianni innuttaasunut issanngusartunut imaluunniit allanik pualluuteqartunut akornutaasinnaassaaq. Taamaammat innuttaasut pualluuteqartut ippigisaqartut illup iluaniissasut kaammattorpagut, Henrik L. Hansen oqarpoq.
Oqartussat pisoq malinnaaffigigaat, aamma annertuumik iliuuseqartoqassappat nalunaarutigineqarumaartoq, nakorsaanerup oqaatigaa.