CIA-mut tunngasunik Inatsisartut misissueqqusipput
Inatsisartut nunanut allanut sillimaniarnermullu ataatsimitsitaliaata naalakkersuisut kajumissaarpaat CIA nunatsinnut akunnittarsimanersoq arlaannulluunniit attuumassuseqanngitsumit misissorneqaqqullugu.
DR1-imi piviusulersaarummi Narsarsuarmi mittarfik CIA-p timmisartornermini akunniffigisarsimagaanik paasissutissat nutaat saqqummiunneqareersullu kajumissaarineq pivoq.
Inatsisartut nunanut allanut sillimaniarnermullu ataatsimiitsitaliaata pingaartippaa, silaannakkuut angallannermi nunat tamat aammaluKalaallit Nunaata nunataanut silaannarnaanullu tunngatillugu nunat tamat akornanni isumaqatigiissutinut naapertuuttumik unioqqutinneqartarsimannginnersut paasiniarnissaat.
Taamaattumik ataatsimiitsitaliap paasissutissat nutaat assut ilungersunartutut isigaat, Kalaallit Nunaallu tassunga tunngatillugu atorneqartarsimanersoq piaartumik paasitinneqarnissani naatsorsuutigalugu. Maannamut Danmarkip nunataani CIA-p unioqqutitsilluni atuisarsimasinnaanerannit paasussutissaasartut eqqunngitsuunerarneqartuaannarsimapput, taamaakkaluartoq ataatsimiitsitaliamiit akuersaasinnaanngilluinnarparput silaannakkut angallanermi inuillu piginnaatitaaffiinik nunat tamat akornanni isumaqatigiissutit unioqqutitsineqartarsimappata.
Aamma pisoq pissutigalugu ataatsimiitsitaliap naalakkersuisunut ilaasortaq Aleqa Hammond ataatsimeeqatiserisimavaa.