CO2-mik suliniutit isornartorsiorneqarput
CO2-mik aniatitsinermik annikillisaaniarluni suliniutit tusarniaassutigineqarnerat naammaseqqammerpoq, tusarniaavigineqartullu affaasa missaat suliniutit pillugit akissuteqarput.
- Suliniuteqartoqanngilaq, erseqqissunimmi anguniagaqartoqanngilaq. Gassinik silaannarmik kissakkiartortitsisartunik aniatitsineq appartinniarlugu suliniutissat pillugit tusarniaanermut, Nunanut allanut naalakkersuisoqarfimmiut akissumminni ilaatigut allapput. Knr.gl taama allappoq.
CO2-mik aniatitsinermik appartitsiniaanermi Kalaallit Nunaat maligassiuisuussanngilaq, akerlianillu CO2-mik aniatitsinini annertusartariaqassallugu, nunanut allanut naalakkersuisoqarfik taama allappoq.
CO2-mik aniatitsinerup 1990-imut naleqqiullugu 8 procentinik 2012 naatinnagu appartinneqarsimanissaa Avatangiisinut naalakkersuisoqarfimmit suliniutigineqarpoq. Kyotomi isumaqatigiissut naapertorlugu tamanna anguniarneqarpoq, CO2-millu aniatitsinerup affaannanngortinneqarnissaa siunertaalluni.
Suliniutit anguniagaqarpasinngitsutut naalakkersuisunut iluatungiliuttunit nukissiuutinullu tunngassuteqartunut ilisimasalinnit nalilerneqarput, suliniutillu kingusinaartumik aallartinneqarnerat aamma oqaatigineqarluni.
Aalisartut CO2-mik aniatitsivallaarunnaarnissaat suliniummi aamma taakkartorneqarpoq, KNAPK-miilli ernummatigineqarpoq aalisartunut tamanna aningaasartuutaavallaarsinnaassasoq. Namminersornerullutik Oqartussat taamaammat aningaasaliisariaqartut kissaatigineqarluni.
Avatangiisinut illersuiniaqatigiiffik Avataq, pisortatigoortumik tusarniaavigineqanngikkaluarpoq, Kalaallilli Nunaat CO2-mik aniatitsivallaanngitsutut maligassiuisuunissaa Avatap ujartorpaa.
Tusarniaanermi akissutit Avatangiisinut Attaveqarnermullu Aqutsisoqarfimmit maanna katersorneqarput, nutaanillu suliniuteqartoqassanersoq nalilersorneqartussanngorluni.