Colap anisuup pitsaassusaa ajoqusersinnaavaa
Angutit inuusuttut colatortorujussuit anisuui pitsaanngillat, qallunaat misissuinerata nutaap tamanna takutippaa. Oqaatigiuminaapporli colatornerinnaq pissutaanersoq peqqinnanngitsumilluunniit inuuneq pissutaanersoq.
Angutit inuusuttut inuunermik ilaanni ataatanngorusuttut iluaqutaasumik colatortarnertik annikillisissinnaavaat. Qallunaat ilisimatuut paasisimavaat colatorpallaarneq anisuullu pitsaanngissusia attuumassuteqartut. Taamatut allappoq nutaarsiassaqartitsivik ritzau.
- Qularnanngitsumik inooriaaseq pissutaavoq colatornerujussuarmik tunngavilik, colalli tamatumunnga pisuujusinnaanera tunuartissinnaanngilarput, Tina Kold Jensen, Syddansk Universitetimi Rigshospitalimilu nakorsaatinut ilisimatooq oqarpoq.
Qallunaat inuusuttut 2500-nik sinneqartut anisuuisa misissoqqissaarnerisa takutippaat colatorpallaarneq anisuullu ajussusia attuumassuteqartut. Angutit inuusuttut sakkutuujusussanngortitaasut misissuinermi peqataapput, tiguneqaraangamik anisuumik misissugassamik tunniussisarlutik koffein-imillu atuinerannik arlalinnik apersorneqartarlutik kaffisortarnerannik, tiitortarnerannik sukkulaatitoqartarnerannik colatortarnerannillu.
Cola burgerillu
- Paasivarput naammaannartumik koffein-itortaraanni - tassa kaffisornermut ullormut tiitorfiit arfineq-pingasut sinnernagit - tamanna anisuup pitsaassusaanut sunniuteqanngitaoq, Tina Kold Jensen oqarpoq.
Misissuinermi peqataasuni angutit inuusuttut 100-t missaanniittut ullormut liiteri sinnerlugu colatortarsimapput, tamakkualu anisuuat allaninngarnitt ajorneruvoq. Colamik pinngitsoorsinnaanngitsut assersuutigalugu aamma nalinginnarmit burgertornerusarput. Ilisimatoorlu malillugu sodavanditorpallaarneq peqqinnaatsunik nerisarnermut timigissartannginngermullu attuumassuteqarpoq. Pissutsit, siusinnerusukkut misissuinermi paasineqarsimasut, anisuup ptisaassusaanut sunniuteqarput.