COP28: Naalakkersuisut nersualaarneqarput silap pissusaata allanngornera pillugu tamaviaaqataanertik pillugu
Pitsaavoq Kalaallit Nunaat silap pissusaata allanngornera pillugu peqataalermat. - Suleqatigiinnerit tamarmik pingaaruteqarput silap pissusaata allanngornerata naapertuilluartumik iliuuseqarfiginiarneqarneranut, ICC-p issittumi tamarmi siulittaasua Sara Olsvig, COP28-mi peqataasoq oqarpoq.
Silap pissusaa pillugu ataatsimeersuarneq COP28, piffissami matumani Dubaimi ingerlanneqartoq, maanna naammassiartuaarneqarpoq, tallimanngornerlu pisoqarfiuvoq pingaarutilik, tassani Kalaallit Nunaat Inuillu ataatsimiinnermi oqaluuserineqartunut ilaapput.
Ilaatigut peqataavoq Naalakkersuisoq Kalistat Lund (IA) nunarsuarmi nunat inoqqaavisa ataatsimiinneranni, tassanilu saqqummiussivoq Inatsisartut Naalakkersuisullu aalajangernerat tunngavigalugu Parisimi isumaqatigiissummut ilanngunnissaq pillugu, tassungalu atatillugu apeqqutinut arlalinnut akissuteqarluni.
Taamak ilisimatitsivoq Issittoq tamakkerlugu ICC-p siulittaasua, Sara Olsvig, Sermitsiaq.AG-mut allakkatigut oqaaseqarnermini. Tassuma Naalakkersuisut nersualaarpai nalunaarutigisaat pillugu:
- Assut iluarisimaarnarpoq, nunarsuarmi nunat inoqqaavisa suleqatiginissaannut Naalakkersuisut assammik isaassimmata. Minnerunngutsumik aamma iluarisimaarnarpoq silap pissusaata allanngornerata kingunerisa iliuuseqarfiginiarneqarnerinut Kalaallit Nunaat peqataalermat. Sileqatigiinnerit suulluunniit tamarmik pingaaruteqarput naapertuilluartumik iliuuseqarnissamut, Sara Olsvig oqarpoq..
Aningaasaateqarfiit ammaanneqarnissaat kimigiisissutaavoq
Sara Olsvig naapertorlugu ataatsimeersuarneq manna COP28 immikkut pingaaruteqarpoq, Parisimi isumaqatigiissut naapertorlugu anguniakkat killiffissiorneqarmata, aamma silap allanngornerata kingunerisaanik aningaasaateqarfiit assigiinngitsut qanoq atorneqarsinnaanissaat oqaluuserineqarmata, aningaasaateqarfiit taakku silap allanngorneratigut ajornartorsiutaalersunut matussusiiniarnermi atugassiaasut pineqarmata.
- Iliuuseqarneq annertuumik aallunneqarpoq, tassanili erseqqissaatigiuartariaqarparput, nunat inoqqaavinut sunniutaasut ersinngiusartutut ikkaluartulluunniit pingaaruteqarluinnartuusut, Sara Olsvig oqarpoq. Taassuma tikkuarpaa aningaasaateqarfiit pineqartut nunat inoqqaavi qulakkeerunneqarnikuunngitsut toqqaannartumik qinnuteqarsinnaanissaminnut. Tamanna pingaartumik issittumi nunat inoqqaavinut tunngassuteqarpoq, taakku tamarmik nunatut ineriartorsimasutut inissisimasutut taaniarneqartarput.
- Nunarsuaq tamakkerlugu nunat inoqqaavisa suleqatigiiffiannit kimigiiserpugut naligiimmik aamma toqqaannartumik aningaasaateqarfiit taakku periarfissaasariaqartut. Tamatuma ilutigisaanik aamma tamaviaarutigaarput, nunat inoqqaavisut ilisimasagut isumaqatigiinniarnerni maannakkut ingerlanneqartuni tunngavittut ilaatinneqassasut, Sara Olsvig oqarpoq, taassumalu erseqqissaatigaa naalagaaffiit arlalissuit taamatut piumasaqarneq tapersersoraat.
Inuusuttoq ataatsimeersuaqataasoq: Inuusuttunik peqataatitsineq alloriarneruvoq siulleq
Tallimanngornermi ICC aamma WWF suleqatigiillutik Inuit aqutaannik pinngortitamik ingerlatsineq erseqqissarniarlugu aaqqissuusseqatigiipput, aaqqissuussarlu taanna ammarlugu Naalakkersuisoq Kalistat Lund (IA) oqalugiarpoq. Tassanilu ICC aamma Kalistat Lund saqqummiussillutik erseqqissaapput Canadap Kalaallillu Nunatta akornanni Pikialasorsuaq pillugu isumaqatigiissuteqaqqammertut.
Taamatuttaaq toqqakkat akornanni oqallittoqarpoq, tassani peqataavoq Louis Papis Chemnitz, ICC sinnerlugu inuusuttutut immikkut toqqagaalluni peqataasoq. Taanna isumaqarpoq issittumi pinngortitap piujuartinneqarnissaanik oqallittarnerni inuusuttut peqataatinneqarnissaat pingaaruteqartoq: - Isumaqarpunga alloriarneq siulleq tassaasariaqartoq inuusuttut peqataatinneqarnissaat. Tamanna nukinnik pigisanik annertusaataalluassasoq qularinngilara. Suleqatigiiffinnut assigiinngitsunut inuusuttut tikilluaqqullugit peqataatinneqartariaqarput, taamaattorli aamma inuusuttut periarfissinneqartariaqarput inuusuttuinnaallutik oqalliffigisinnaasaminnik katersuuffeqalersinnissaat, taamaattoqalerpammi inuusuttut suliniarnermut piginneqataasutut misigisimanerulernissaannut iluaqutaassaaq.
- Issittumi pinngortitap piujuartinneqarnissaanut tunngatillugu anguniagara tassaavoq Issittumi inuiaqatigiit tassaassasut sallersaallutik suliniuteqartussat. Tamanna ilutigalugu ataatsimoorluni ineriartortitsinermi ilisimasanik aammalu pissutsit qanoq innerinik paasinnissinnaanermut annertusaaqatigiinneq aqqutigalugu ilisimasat katersiviinut tunniussueqataasinnaasut peqataatillugit, tassanilu nunat inoqqaavisa ilisimasaat ilanngunneqartuassapput, Louis Papis Chemnitz oqarpoq.
COP28 marlunngorneq ilanngullugu ingerlassaaq.