Corona: Illoqarfiit arlallit tunillaassuuffiupput
Peqqinnissaqarfiup immikkoortortaqarfiini tamani illoqarfiit arlallit Covid-19-imik tunillaassuuffiupput. Illoqarfinnili annerusuni tunillaassuunneq annikilliartortutut isikkoqarpoq. Qaammatip ataatsip iluani Covid-19-imik tunillatsissimasoq ataaseq toqusimasoq aamma nalunaarutigineqarpoq.
Kingullermik nalunaarusiortoqareerneraniit ullumikkumut PCR atorlugu misissuinerit 70-it akissutissarsiffigineqarsimapput. Taakkunanngalu 57 procentii tunillatsissimanermik takussutissaqarlutik. Nunatta nakorsaaneqarfiata nittartakkamini tamanna ilisimatitsissutigaa.
Peqqinnissaqarfiup immikkoortortaqarfii tamarmik illoqarfinni arlalinni tunillaassuuffiusoqarneranik nalunaaruteqarput. Illoqarfinnili annerusuni tunillaassuunneq annikilliartortutut isikkoqarpoq.
Sermersuumi Tasiilaq aamma Paamiut, Kujataani Nanortalik, Qeqqani illoqarfiit tamarmik, Qeqertarsuup Tunuani Qasigiannguit aamma Qeqertarsuaq, kiisalu Avannaani Qaanaami aamma Uummannami tunillaassuunneq annertuvoq.
Nuummi, Qaqortumi, Narsami, Aasianni Ilulissanilu tunillaassuunnerup annikilliartulernera takussutissaqarpoq. Upernavik suli tunillaassuuffiulersimanngilaq.
- Upernavimmi coronap allannguutaa delta siorna ukiup naajartulernerani tunillaassuutsitsingaatsiarpoq. Maannamulli coronap allannguutaa omikron suli tuniluutilersimanngilaq, nunatta nakorsaaneqarfia allappoq.
Ataaseq toqusimasoq
Inuk ukioqqortunerusoq, qaammatip ataatsip kingulliup iluani Covid-19-imik tunillatsinnikuusimasoq, marlunngornermi 15. februar toqusimasoq nalunaarutigineqarpoq.
- Nunatsinni tunillaassuuttoqalerneraniilli maannamut innuttaasut qulit Covid-19-imut attuumassuteqarsinnaasumik toqquteqarsimalerput, nakorsaaneqarfik allappoq.
Uninngasut ikileriartut
Ullup ataatsip ingerlanerani uninngasut pingasut angerlarsinnaalersimapput. Nuummi marluk Qaqortumilu ataaseq. Nuummili ataaseq aamma Sisimiuni ataaseq Covid-19-imik tunillatsissimasut unitsinneqarsimapput.
- Marlunngornermi 15. februar nal. 16.00 Covid-19-imik tunillatsissimasut arfineq-pingasut uninngatinneqarput. Nuummi sisamat, Sisimiuni pingasut Paamiunilu ataaseq, ilisimatitsissutigineqarpoq.
Uninngasut pingasut Covid-19 peqqutigalugu uninngapput. Uninngasoq ataaseq allamik nappaateqarluni uninngavoq, Covid-19-ili nappaataanut sunniuteqarsinnaalluni. Uninngasut allat sisamat allamik peqquteqarlutik uninngapput, Covid-19-imilli tunillatsissimallutik. Peruluttut inaanni Covid-19-imik tunillatsissimasumik maanna uninngasoqanngilaq.