Corona: Kujataani peqqinnissaqarfik tuniluunnermit eqqugaaqqasoq
Kujataani peqqinnissaqarfimmi sulisunik amigaateqartoqarpoq sulisut akornanni coronap tuniluunnera pissutigalugu. Qaqortumi Nanortalimmilu tuniluunneq suli annertuvoq. Ullup ataatsip ingerlanerani Covid-19-eqartumik ataatsimik nutaamik unittoqarpoq - pingasullu angerlartinneqarput.
Ullup ataatsip ingerlanerani PCR-testit 46-t misissorneqarput, taakkunannga 41 procentit tunillatsissimasut paasineqarpoq. Narsami Narsarsuarmilu tuniluunneq annikilliartortutut nalilerneqarpoq, taamaattorli Qaqortumi Nanortalimmilu suli annertuvoq.
- Qaqortumi Nanortalimmilu tuniluunneq annertuvoq. Peqqinnissaqarfimmi sulisut amigaatigineqarput sulisut akornanni napparsimasoqarnera pissutaalluni, nunatta nakorsaaneqarfia nittartakkamini taama allappoq.
Maniitsumi peqqinnissaqarfik aamma tuniluunnermit eqqugaaqqavoq. Peqqinnissaqarfimmi sulisut akornanni aamma amigaateqartoqarpoq sulisut akornanni tuniluuttoqarnera pissutaalluni. Kangaamiuni Atammimmilu tuniluunneq annikilliartorpoq. Kangerlussuarmi tunillatsittut ikittunnguupput Napasumilu ataasiakkaanik tunillatsittoqarsimavoq.
Unittoq nutaaq ataaseq - angerlartinneqartut pingasut
Aasianni ilinniarnertuunngorniarfimmi atuartut sulisullu akornanni tunillatsissimasut 76 procentiusut, nunatta nakorsaaneqarfiata sapaatip akunnerata siuliani paasissutissiissutigaat. Maanna tuniluunneq annikilliartortoq nalunaarutigineqarpoq.
Sapaatip akunnerata ingerlanerani agguaqatigiisillugu ullormut sisamat nutaat Covid-19-ertut unitsinneqartarput. Maanna ullup ataatsip ingerlanerani Covid-19-eqartoq ataaseq nutaaq unitsinneqarpoq.
Nuna tamakkerlugu Covid-19-eqarlutik uninngasut maanna arfineq-pingasuupput. Nuummi pingasut, Sisimiuni pingasut, Qaqortumi ataaseq Nanortalimmilu ataaseq.
- Uninngasut marluk akornanni Covid-19 pingaarnertut peqqutigalugu uninngapput (Kategori 1). Ataaseq perululluni Dronning Ingdrigip Napparsimavissuani uninngavoq.
- Covid-19-imik tunillatsissimasut pingasut nualluummik sunnerneqarlutik uninngapput. Kisianni Covid-19 pingaarnertut napparsimassutigalugu uninnganngillat (Kategori 2).
- Uninngasut pingasut covid-19 pingaarnertut peqqutigalugu uninnganngillat. Taakkununngalu Covid-19 uninnganerannut sunniuteqanngilaq (Kategori 3), Nunatta Nakorsaaneqarfia nittartakkamini paasissutissiivoq. Nunatta nakorsaaneqarfia paasissutissiivoq.