Corona: Napparsimavimmut unitsinneqartut akornanni akiuussusersorneqarsimasut ima amerlatigaat
Napparsimavimmut unittut nutaat pingasunngornermi sisamaapput. Coronap tuniluunnerani Covid-19-eqarlutik napparsimavummut unittut qassit naammassillutik akiuussusersorneqarsimanersut akiuussusersorneqarsimanngitsullu nunatta nakorsaaneqarfianiit misissorneqarput.
Ullup ataatsip ingerlanerani PCR-testit 130-it misissorneqarput. Misissorneqartuni 37 procentii tunillatsissimapput.
Coronap tuniluunnerani katillugit naammassillutik akiuussusersorneqarsimasut 98-it napparsimavimmut unitsinneqarsimapput. Taakkuli corona pingaarnertut peqqutiginagu napparsimavimmut unitsinneqarput. Akiuussusersorneqarsimanngitsulli 38-it unitsinneqarsimapput, taakkuli corona pingaarnertut nappaatigalugu unitsinneqarput.
Ullup ataatsip ingerlanerani unittut nutaat sisamaapput. Kujallermi Covid-19-eqarlutik unittut nutaat pingasuupput. Qaqortumi ataaseq, Nanortalimmi ataaseq Narsamilu ataaseq. Taassuma saniatigut Nuummi nutaamik unittoqarpoq.
- Covid-19-eqarlutik unittut arfineq-pingasuniit aqqaneq-marlunnut ullup ataatsip ingerlanerani amerlipput. Nuna tamakkerlugu ullumi februaarip 16-ani nalunaaqutaq 16.00 Covid-19-eqarlutik unittut katillugit aqqaneq-marluupput. Nuummi tallimat, Sisimiuni pingasut, Qaqortumi ataaseq, Nanortalimmi ataaseq, Narsami ataaseq Paamiunilu ataaseq. Taama Nunatta Nakorsaaneqarfia tusagassiuutinut nalunaarummini allappoq.
Akiuussusersorneqarsimasut amerlanerit unitsinneqarput
Nunatta Nakorsaaneqarfiata uninngasut akornanni qassit akiuussusersorneqarsimanersut misissorpaat. Misissuinerullu takutippaa unittut amerlanerpaartaat akiuussusersorneqarsimasut. Nunattalu nakorsaanerata erseqqissaatigaa naammassillutik akiuussusersorneqarsimasut allamik pingaarnertut nappaateqarnertik pissutigalugu napparsimavimmut unitsinneqartartut.
- Ilumoorpoq uninngasimasut akornanni amerlanerpaat naammassillutik akiuussusersorneqarsimasut. Kisianni eqqaamasariaqarpagut taakkunani amerlanerpaat allamik nappaateqarneq pissutaalluni unittoqartarmat, Covid-19 pingaarnertut pissutigalugu uninneq ajorput. Eqqaamassariaqarparpullu inuiaqatigiit iluanni amerlanerpaat akiuussusersorneqarsimammata, nunatta nakorsaanera Henrik L. Hansen Sermitsiaq.AG-imut taama nassuiaavoq.
Taassumallu erseqqissaatigaa coronamut akiuussusersorneqarsimanngitsut corona pingaarnertut peqqutigalugu napparsimavimmut unitsinneqartartut.
- Coronap tuniluunnerani katillugit 58-it Covid-19 pingaarnertut nappaatigalugu unitsinneqarput (Kategori 1). 86-it corona pingaarnertut nappaatiginagu unitsinneqarput (kategori 2 aamma 3). Kategori 1-imi unitsinneqartuni 53 procentit naammassillutik akiuussusersorneqarsimapput imaluunniit naammassinatik akiuussusersorneqarsimapput. 87 procentillu kategori 2-mi aamma 3-mi naammassillutik akiuussusersorneqarsimapput imaluunniit naammassinatik akiuussusersorneqarsimallutik. Agguaqatigiisillugu inersimasut akornanni uninngasuni arfineq-marluugaangata ataaseq taamaallaat immikkut ikiorserneqartariaqartarsimavoq, nunatta nakorsaaneqarfia nittartakkamini taama allappoq.
Covid-19-eqarlutik uninngasut ullumikkut ima isikkoqarput:
- Uninngasut sisamat Covid-19 pingaartut uninngassutigaat (Kategori 1).
- Uninngasoq ataaseq Covid-19-imik tunillatsissimaneq allamik nappaateqarnermut sunniuteqarpoq. Kisianni nappaat alla pingaarnertut uninngassutaavoq (Kategori 2).
- Uninngasut arfineq-marlunni Covid-19 pingaarnertut nappaatiginagu uninngapput. Taakkununnga covid-19 uninnganeranut annertunerusumik sunniuteqanngilaq (Kategori 3).