Corona: Pisiniarfinni ilitsiviit imaaruttut
Coronavirusimut ernummateqarneq nunami pisiniarfiit ilitsiviini takuneqarsinnaanngorsimavoq. Assannut spritit, c-vitaminit kiinarpaallu nungulluinnarsimasut pisiniarfinnit amerlanerusunit nalunaarutigineqarpoq.
Pisiniarfinnit amerlanerusunit nalunaarutigineqarpoq, corona pissutigalugu nioqqutissanik assigiinngitsunik eqqanaarisoqartoq.
- Inuit tunillaassortoqarsinnaaneranik eqqarsaateqartut malugilluarsinnaavarput, Rita Hornum Nuummi Matasimik piginnittoq oqarpoq.
Pisiffimmi pisiortortarnermut nittarsaassisarnemullu pisortaq oqaluttuarpoq, inuit eqqanaarsalersimanerat takusinnaallugu. Pingaartumik assannut qaqorsaatit, eqqiluisaarnissamut atortut pappiallu, soorlu eqquutissat køkkenrullellu matumani pineqarput.
- Aatsaat ullut tallimat kingulliit ingerlaneranni eqqanaarisorpassuaqalerpoq, Heine Stilling Jensen oqarpoq.
Kiinarpat assannullu spritit nungussimasut
Taanna oqarpoq pisumut malinnaalluarlutik, pisinianillu piumaneqarluartut sapinngisamik piaartumik tikisinnissaat sulissutigisarlugu.
Starkimi Nuummiittumi aamma taamatut atugaqartoqarpoq.
- Ippassaq kiinarpaateqarluarpugut. Ullumikkut tamarmik nungoreerput. Ilitsivit imaarupput, Starkip immikkoortortaani pisortaq Lars Frandsen oqarpoq.
Nuummi Brugsenimi pisortap tulia Johnny Mikkelsen oqaluttuarpoq, assannut spritit sapaatip akunnerata siulianili nungussimasut. Sapaatip akunerata naanerani timmisartukkut nutaanik tikittoqassaaq, taanna oqaluttuarpoq.
Pisiniat isumassarsiullaqqissut
Matasimi Nuummiittumi pisiniat isumassarsiullaqqinnerat maluginiarneqarsimavoq, tassa pisiniat assannut spritimik servietsinilluunniit tunillannartuiaatilinnik pisisinnaanngikkaagamik isumassarsiullaqqinnerat maluginiarneqarsimavoq.
- Pisiniartuvut internetsikkut qanoq assannut spritiliortoqartarnersoq missorsimariarlugu isertarput spritiliassap akussaanik pisiniarlutik. Spritip puussaaraanik pisiaqartarput, Ria Hornum oqarpoq.
Matas Nuummiittoq tunillannartuiaatinik 1000-inik amerlanerusunik februaarip 28-anili tunisaqarsimasoq, pisiniarfimmik piginnittoq oqaluttuarpoq.
Starkimi pisiassat nunguttarnerat misigineqaannaanngilaq, aammali nutaanik tikisitsiniarnerup ajornarnera misigineqarsimalluni.
- Kiinarpannik, atisanik ataasiaannarluni atugassanik assannullu spritinik Danmarkimiit pissarsiniarnerput ajornartorsiutigisimavarput, Lars Frandsenoqarpoq.