Corona: Uninngasut qulingiluanut ikileriartut
Nunatta Nakorsaaneqarfiata pingasunngornermi ilisimatitsissutigaa tunillatsissimasut uninngasut pingasunngornermi qulingiluaasut, taamaasillutillu ikileriarsimasut. Tasiilami suli tunillaassuuttoqarpoq.
Nunatta Nakorsaaneqarfiata covid-19 nunatsinni tuniluunnera pillugu pingasunngornermi 9. februar ilisimatitsinermini paasissutissiissutigaa marlunngornermut sanilliullugu uninngasut ikileriarsimasut.
- Marlunngornermi 8. februar ilisimatitsinermiit maannamut nutaamik ataatsimik, Sisimiuni, unittoqarpoq. Uninngasulli allat arfineq-marluk napparsimmavimmiit angerlarsinnaasimapput - tassa Ilulissani marluk, Uummannami ataaseq, Aasianni ataaseq, Nuummi ataaseq, Paamiuni ataaseq Qaqortumilu ataaseq, nakorsaaneqarfik allappoq.
Nunatsinni uninngasut katillugit maanna qulingiluaapput. Nuummi tallimat, Sisimiuni pingasut Ilulissanilu ataaseq.
Uninngasoq ataaseq covid-19 peqqutigalugu uninngavoq, taannalu peruluttut inaanni maanna uninngalluni.
Uninngasut pingasut allanik nappaateqarput, covid-19-imillu tunillatsissimanerminni nappaataat sunnertissinnaalluni. Uninngasut tallimat allamik peqquteqarlutik uninngapput, covid-19-imilli tunillatsissimasut paasineqarsimallutik.
Tasiilami suli tunillaassuuttoqarpoq
Tasiilami covid-19-imik tunillatsissimasut arlallit paasineqarput. Arlallimmi angerlarsimallutik misissuummik misiliinerminni tunillatsissimallutik paasivaat.
- Tasiilami angerlarsimaffimmi misissuutit atorlugit tunillatsissimanermik paasisaqartut arlaqarput. PCR atorlugu misissuinernit sisamat tunillatsissimasut paasineqarput, misissugassallu 47-t akissutisinissaat maanna utaqqineqarlutik, allassimavoq.
Ittoqqortoormiini tunillatsissimasoqanngitsoq, ilisimatitsissutigineqarpoq.
Naalakkersuisut pingasunngornermi tusagassiortunik katersortitsinerminni ilisimatitsipput unnuap qeqqaniit killilersuutit arlallit atorunnaassasut.