Coronavirusimik tunillatsissimasumik Uummannami nassaartoqartoq

Coronavirusimik tunillatsissimasoq Uummannamiittoq paasineqarpoq. Namminersorlutik Oqartussat taama ilisimatitsipput.

- Inuk ataaseq Danmarkimiit Uummannamut tikissimasoq, tikinnerminiit ullut arfineq aappaanni misissortinnermini tunillatsissimasoq paasineqarpoq. Angalanermini Uummannamiinnerminilu qanillisimasaanik tamanik tunillatsittoqarsimasinnaaneranik misissuineq tamakkiisoq aallartinneqarpoq. Tunillatsissimasinnaasunik paasiniaaneq politiit nakorsaaneqarfik suleqatigalugu ingerlappaat, ilisimatitsissutigineqarpoq.

Nalunaarummi ilisimatitsissutigineqanngilaq pineqartoq tikinnerminit angerlarsimaannaqqaarsimanersoq.

Tunillaassoratarsinnaaneq annikitsutut nalilerneqarpoq

Qanillisimasinnaasai tamarmik nassaarineqarput aammalu tuniluuttoqalersinnaanera pinngitsoortinniarlugu angerlarsimaannaqqullugit ilisimatinneqarput.

Coronavirusimik tunillaassortoqaratarsinnaaneranut aarlerinaat annikitsutut nalilerneqarpoq.

Angerlarsimaannaqqusaasut tamarmik ullumikkut Corona pillugu Allattoqarfimmi sulisunit attaveqarfigineqassapput, piffissap angerlarsimaannarfigeqqusaasup sivisussusissaa misissortinnissamullu periarfissat pillugit paasissutissinneqassallutik, ilisimatitsissutigineqarpoq.

- Piffissami aggersumi Kalaallit Nunaannut tikittussat amerlasussaapput. Piffissami tassani tunillatsissimasut arlallit tikinnissaat ilimanaateqartorujussuuvoq. 2021-mi januaarip sinnerani Kalaallit Nunaanni tunillaassuisinnaanerup ulorianartorsiorfiunera annertusingaatsiassaaq, Namminersorlutik Oqartussat allapput.

Taamaattumik piffissami aggersumi sillimaffigisassat tamarmik, tuniluuttoqarsinnaaneranut annikillititsisussat eqqumaffigilluarneqassasut inassutigineqarpoq:

• Qanillinaveersaarit, 2 miiterimillu ungasitsigalusit, attaveqarnaveersaarit
• Eqqiluisaarit
• Napparsimanermut ersiuteqaruit angerlarsimaannarit, misissortinnissallu pillugu peqqinnissaqarfimmut oqarasuaatikkut attaveqarlutit.