Covid-19-ip nunatsinni kingunerluutai: Suli erseqqissunik paasisaqartoqanngilaq

Nunatsinni nappaammik tunillaassuuttumik covid-19-imik nappaalasimasut kingunerluutinit eqqugaasimannginnersut ukioq manna kingusinnerusukkut oqaatigineqarsinnaalissasoq ilisimatusartut neriuutigaat.

Ilisimatusaatigalugu misissuinikkut aallartinneqareersukkut misissuiffigineqarpoq, inuit covid-19-imi tunillanneqarnermikkut qanoq napparsimatigilersimanersut. Ukiut marluk matuma siornagut juulimi 2021-mi Nuummi inuit misissortinniarlutik ullut tamaasa siuleriiaattorpassuusarput.

Leiff Josefsen

Aaqqissuisoqarfik

Published 13 July 2023 - 08:10

Annonse

Naak corona qujanartumik atugaajunnaaraluartoq, nakorsat akornanni nappaatip nunarsuaq tamakkerlugu tuniluuttup kingunerisinnaasai kingunerluutigisinnaasaalu misissuiffigissallugit suli soqutigineqarput. Taama aviisi AG allappoq.

Covid-19-ip kingunerluutaannut nassuiaatit

Malunniutit Covid-19-imut assersuunneqarsinnaasut tunillanneqarnermit sapaatip akunnerini 12-ini sivikinnerusumiluunniit atuussimasut (Danmarkimi peqqissutsimut aqutsisoqarfik).

Anersaartuutitigut piffissami sivisuumi ippigisaqarnerit (anersaartorniarnikkut, sakissakkut ippigisaqarnerit, quersorneq), sunniutit nalinginnaasut (kiaqarnerit, qasuneq, qasoqqaneq), eqqarsartaatsikkut sunniutit (puigutoqqajaaneq ukkataqarsinnaannginnerlu), ippigusuutit sakkukinnerit (naarlunneq, timminneq, illigisaqannginneq), avatini anniarnerit, niaqorlunneq, uissannguneq, naamasinnaanermik mamassutsimillu malussarsinnaanermik sivisuumik malussarsinnaannginneq, isummakkut nanertisimaneq il.il.

Najoqqutaq: sundhed.dk

Maanili Nunatsinni innuttaasut nappaammit nunarsuaq tamakkerlugu tuniluuttumit kingunerluutinik qanoq eqqugaatigisimanersut oqaatigissallugu maanna suli piaarpallaaqaaq.

- Misissuinerit inernerisa 2023-p naalernerani pissarsiarinissaat naatsorsuutigaarput, DIH-mi nakorsanut paarlattaasartoq Trine Abelsen ilisimatusaatigalugu suliniummi covid-19-ip Nunatsinni kingunerluutaannik misissuinermi aqutsisuusoq oqarpoq.

Suliniummi pilersaarutaasumi ilaatigut Nunatsinni Ilisimatusarnermut Siunnersuisoqatigiinnit aningaasatigut tapiiffigineqarsimasumi tunngavigineqarpoq qarasaasiakkut apeqqutinik immersuisitsilluni misissuineq, tamatumani timikkut isumaliortaatsikkullu ersiutit pineqarlutik. Misissuinermi peqataasut apeqqutit immersorlugit akisassat ukiup ataatsip ingerlanerani pingasoriarlutik akissutinik qarasaasiakkut immersuisassapput.

Misissuineq aallartilluarpoq, apeqqutinik immersuisitsinermi siullermi peqataasut 308-aallutik. Trine Abelsenip oqaatigaa, akissutigineqartut procentiat aappassaannik immersuisitsinermi akissutigineqartut ikinnerulaartut (novembarimi 2022-mi) pingajussaannillu immersuisitsilluni misissuinermi akissutigineqartut ikinnerusut (marsimi 2023-mi).

Nakorsat Nunamedimi oktobarimi siorna ataatsimeersuarneranni kingunerluutinik misissuinissamik pilersaarutigineqartuni inernerugallartut siulliit saqqummiunneqarput, tamatumanimi paasineqarmat tunillanneqarsimasunut ersiutaanerusartut tassaasut qasoqqaneq, niaqorlunneq, qinngakkut milittoorsimaneq/qinngakkut nuak kuuttoq, quersorneq aamma nukitigut naggussatigullu anniarnerit.

Allaaserisaq tamaat AG-mi sapaatip-akunnerani saqqummersumi atuaruk, uani:

AG - 12/07-2023

Klik her for at læse