Cult pikkugisaaqaaq
Nuummi Pisiffik Brugsenilu Cult Colat miinerpaamik 12.000-it qaammammut tunisarpaat.
Cult Cola pisiniarfinni nioqqutissani nuannarineqarnerpaat akornanni inissisimavoq. Takunngitsoorneqarsinnaanngilarlu meeqqat pisiarisaraat imertarlugillu.
- Meeqqat Cult Colaaserlutik pisiniarfimmiit anisut takussallugit annernarpoq, Brian Juhl Pisiffimmi pisiniarfiup ittuat Sermitsiaq.AG-mut oqarpoq.
Taamaakkaluartoq nunatsinni pisiniarfiit meeqqanut imeruersaatinik inuummarinnartutalinnik tunisisinnaapput, inatsiseqanngilarmi tamatuminnga pinngitsoortitsisussamik.
Sapaatip akunneranut Cult Colat 2.800-it Brugsenip pisarpai, Brian Juhlillu oqarneratut Pisiffiup 1.000-it qammammut tunisarpaat. Tassa minnerpaamik Pisiffik Nuup Brugsenillu qillertuusat 12.000-it tunisarpaat.
Angajoqqaat ernumasut
Meeqqat arlallit imeruersaammik inuummarinnartutalimmik imersimallutik uummamminnik kassuttoorsimapput sajukulaarsimallutillu, tamatumalu kingorna angajoqqaajusut Peqqissutsimut Naalakkersuisoqarfimmut saaffiginnissimapput. Naalakkersuisoqarfiullu Nerisaqarneq Pillugu Siunnersoqatigiit qinnuigisimavai paasissutisseeqqullugit.
Nerisaqarneq Pillugu Siunnersoqatigiit Danmarkimi Fødevarestyrelsip meeqqat aqqaneq marluk inorlugit ukiullit imeruersaatinik inuummarissaatitalinnik imeruersartannginnissaannut siunnersuutaat tapersersorpaat. Meeqqanut inuusuttuaqqanullu 12-iniit 18-init inorlugit ukiulinnut imeruersaatinik inuummarissaatitalinnik imeruersarnissaq annikitsumik atoqqullugu siunnersuutigineqarpoq.
Nakorsaq siunnersuivoq
Jesper Olesenip nakorsiartarfimmi ittuusup oqarneratut naliginnaalluinnarpoq imeruersaammik inuummarissaatitalimmik imernerup kingorna ummammik kassuttoorneq eqqissiveerunnerlu.
- Meeqqat inuusuttullu imigassamik aalakoornartutalimmik siusinaarlutik atuilertarnerat imeruersaammik inuunnarinnartutalimmik atuinikkut pinngitsoorneqarsinnaappat taanna siunnersuutigissavara, Jesper Olesen oqarpoq.
Isumaqarpormi inuiaqatigiit arlaatigut aanngajaarniutissaminnik ujaasisuartuusut, taamaammallu imeruersaatit inuummarinnartutallit aalakoornartunit peqqinnarneroqisut siunnersuutigerusuppai. Erseqqissaatigaalu tamanit pingaarnertut imeq imeruersaatitut atorneqartussatut siunnersuutigerusukkamiuk taannamigooq pitsaanersaammat.