D: Aalisakkanut akitsuut amerlanerussuteqarpoq
Demokraatit aalisarnermut oqaaseqartartuata nuannaarutigaa Siumup aalisakkanik nioqqutissiortut akiliisittalerniarmagit.
- En to tre – Hurra Hurra Hurra. Siumup suaarutigisartagaa tamatta nalunngilarput, ullumikkorpiarlu kiisami hurraartoqataasariaqarlunga misigisimavunga.Tassami Demokraatit pingaartillugu anguniagaasa ilaat Siumup tigusimammagu, tassalu aalisartut pinngortitatsinni pisuussutinik atuinermut akiliuteqartalernissaat eqqunnialermassuk, aalisarnermut oqaaseqartartoq Jens B. Frederiksen allappoq.
- Maannalu Siumut Demokraatillu Inatsisartuni amerlanerussuteqareermata taava naatsorsuutigaara tamanna kingusinnerpaamik 2009-mut Aningaasatigut Inatsisissamik akuersissuteqarnermut atatillugu pinngortitami pisuussutitsinnik atuinerup akitsuuserneqarnissaata atuutilernissaa piviusunngortinneqarumaartoq.
Ataaserli qulakkeeqqaartariaqassaaq:
- Matumanili apeqquterujussuanngortussaq tassa Siumup naalakkersuisuutitaqaqataata Atassutip taamatut nalunaaruteqarneq qanoq isumaqarfigissaneraa. Naluneqanngitsutummi Atassutip pinngortitap pisuussutaanik atuinerup akitsuuserneqarnissaanut akerliusorujussuummat, taamaammallu apeqqut pillugu naalakkersuisooqatigiit iluminni pissaaneqarniutilernissaat pissanganarpoq, Jens B. Frederiksen allappoq.