D: Aningaasaqarnermut inatsitsip nunarput ajoqusersinnaavaa
- Nunatta karsia 2012-imi imaarutissaaq, Palle Christiansenip paasivaa.
- Kisitsisit pingaarnerit inernerisalu takutitaat aningaasaqarnermut inatsisissatut siunnersuut 2009-mi 441 millioner koruuninik amerigartooruteqartussaq ajorluinnarpoq, taamak Demokraatit Aningaasaqarnermut Ataatsimiitsitalilaani ilaasortaatitaa Palle Christiansen sermitsiaq.gl-imut oqarpoq, naalakkersuisut 2009-imut aningaasaqarnermut inatsisissamut siunnersuutaannut oqaaseqaammini.
Taassuma pingaartumik maluginiarpaa, nunatta karsia 2012-imi aningaasanik tigoriaannakkanik nunguutisussaasoq, aningaasanillu atuineq taanna ilaatigut namminersornerullutik oqartussanut eqquisussaasoq.
– Naalakkersuisut novembarip 25-iani namminersorneq pillugu innuttaasunik taasititsinissamut angernissamut nukiit tamaasa atorniarpaat, peqatigitillugulu naalakkersuisutta nunatta karsia imaarniarpaat, suliassanut nutaanut akissaarutitilluta, Palle Christiansen oqarpoq.
Namminersorneq pillugu isumalioqatitgiissitap isumaliutissiissummini innersuussutigaa, akissussaaffeqarfiit 30-it tungaanoortut katillugit 300 millioner koruuninik akeqartussat namminersornerup nammineq aningaasalersugassaasa tiguneqarnissaat.
– Nallakkersuisut nunatta karsianik taamak sukkatigisumik imaarsiniarnerat eqqarsaatigalugu immaq namminersornerunerup attatiinnarnissaa pitsaanerussagaluarpoq, tassuunakkummi akisussaaffimmik tigusinermi aningaasartai ilanngunneqartarmata, Palle Christiansen oqarpoq.
Taamaakkaluartoq aamma naalakkersuisunut nersorinnippoq:
- Inissaqarniarnerup tungaatigut naalakkersuisut Demokraatit politikkiannik ingerlatsipput. Naalakkersuisut siunnersuutigaat inissialiortiternermut aningaasaliissutit nunaqarfinniit avinngarusimasuniillu illoqarfinnut angisuunut namminersortumillu illuliortiternernut nuunneqarnissaat.
Akerlianilli isumaqarpoq, naalakkersuisut aningaasaqarnermut inatsitsissatut siunnersuummi imminnut kiffaanngissusertut:
– Naalakkersuisut nunatta nukissiorfiutaata Nukissiorfiit aktiaatileqatigiiffinngortereersutut isigilereerpaat. Siunnersuut Inatsisartut upernaakkut ataatsimiinneranniit ukiakkut ataatsimiinnissaannut kinguartinneqarpoq, taamaattumik tamanna suli aalajangiiffigineqanngilaq.
Aleqa Hammondip illuatungiliuttunik isumaqatigiinniarnernut qaaqqusisimannginnera Palle Christianseip pakatsissutigaa.
- Siunnersuut isumaqatiginninniutissaanngilaq, kisianni oqallinnermut tunngaviusinnaavoq, Aleqa Hammond oqarpoq.
- Drmokraatit pisarnertik malilugu tulleriissaarinermut allattuiffiliorniarput, Aleqa Hammondilu aningaasaqarnermut inatsisissap suliareqqinnerani isumassarsiorfissamik amigaateqaruni uagutsinnut sianiinnarsinnaavoq, Palle Christiansen oqarpoq.
Aleqa Hammondip aningaasaqarnermut inatsisissamut siunnersuutaa spaltimi talerpiatungaaniit takuuk.