D: Aqqalu aamma Nikkulaat tunuassapput

Demokraatit Nikkulaat Jeremiassenip (S) aamma Aqqalu Jerimiassenip (A) inissisimanerat suli ajornerulersippaat.

Naalakkersuisuni atorfimminnit maannakkorpiaq tunuartariaqarput. Imaluunniit Naalakkersuisut siulittaasuata soraarsittariaqarpai. Randi Vestergaard Evaldsen Demokraatit sinnerlugit taama allappoq.

- Naatsumik oqaatigalugu Nikkulaat Jeremiassen arlaleriarluni aalisapilunneq aammalu qaleralinniarnermi piujuaannartitsinissaq tunngavigalugu aalisarneq pillugu imminut assortuuttunik arlaleriarluni oqaaseqaqattaarpoq. Taamaattoqarsinnaanngilaq. Inatsisartunut ilaasortat innuttaasullu piumasaraat Naalakkersuisoq kinaluunniit eqqortumik oqaluttassasoq. Takinerusariaqanngilaq taamaattussaavorlu, Randi Vesterfgaard Evaldsen taama nalunaaruteqarpoq.

- Aqqalu Jeremiassenimut tunngatillugu Demokraatiniit oqaasii sakkortunerpaamik akerlilerpagut, oqarmat silap pissusaata allanngoriartornera inuup pilersitarinngikkaa. Oqaaseqarnera inuttut isummamik aallaaveqarneruvoq ilisimatuussutsikkullu paasisanut uppernarsaatissalinnut assortuilluni taamaattumik nunarsuarmioqatitsinnit isiginerlunneqalerataannaavugut.

Partiip tallimanngormalli oqariartuutigaa, Aqqalu Jerimiassenip inuttut nammineq isummamik oqarnertut nassuiaanera atorneqarsinnaanngitsoq. Randi Vestergaard Evaldsenip maanna uteqqillugu oqaatigaa, ulloq unnuarlu naalakkersuisuusoqartartoq.

- Qulaani taasagut pissutigalugit paatsoorneqartariaqanngitsumik ersarissumik oqaatigissavarput Nikkulaat Jeremiassen Aqqalu Jeremiassenilu tatigiunnaaratsigit. Taakku sukkanerpaamik tunuartariaqarput. Demokraatiniit inuit taasagut Naalakkersuisuunissaminnut piukkunnanngitsutut isigaagut. Nunarput pineqarpoq, uppernassuserput siunissarpullu - taakkulu innarlerneqassapput pineqartut ingerlaqqiinnassagaluarpata.
- Ataqqinartuliornerussaaq taamaallaat marluullutik kinguarsaanatik Naalakkersuisut Siulittaasuannut soraarniutiminnik tunniussigunik.