D: Immikkoortinneqarpugut
Nutartigaq: Demokraatilli Upernavimmi qinersisartunik ataatsimiititsinermi assigiinngisinneqarnermik maalaarutaat Atassummit eqqunngitsuunerarneqarpoq.
Upernavimmi marsip 19-iani qinersisartunik ataatsimiititsinermi Demokraatit pingasunik qinigassanngortitaqarfigisaanni qinigassanngortittut taakku oqaatsitigut nikanarsagaanermik assigiinngisinneqarput, Demokraatit aaqqissuussaanermut siulittaasup tullia Jens B. Frederiksen,tusagassiuutinut nalunaarpoq.
- Upernavimmi qineqqusaartut partiitillu qallunaatut ilisaritissinnaasimavaat, kisianni tusarnaartunit tamanna ersaattaaneqarmat pissuseq tamanna allanngortinneqarluni taamaallaat kalaallisut akineqartartussanngortinneqarpoq.
Taamali pineqarnermik saqummiussineq Upernavimmi qineqqusaarnernik ataqatigiissaarisumit Knud Kristiansenimir, Atassummeersumit, akerlilerneqarpoq.
- Ataqatigiissaarisuni, Demokraatit aamma peqataaffigisaanni, kissaatigineqarsimanngilaq 19.marts qallunaatut oqaasillit aamma peqataanissaat. Qineqqusaarnissarlu aallartiliivissoq piffissaq kingulleq atorlugu aatsaat allanngortiteriniarsarigaluarput, soorunami minutsit kingulliit atorlugit iliuuseqarniarneq partiit ataqatigiissaarisuisa akuerinngilaat, isumaqatigiissutaareersoq malinneqassammat, Knud Kristiansen allappoq.
Erseqqissaatigaa pilersaarutigineqareersimasoq arfiningorpat 22. marts qallunaatut qineqqusaartoqassasoq.