D-mi qinigassanngortittoq : Politik pissanganarpoq
Demokraatiniit Nuka Bisgaardip qineqqusaarnermini pilersitsiortornermut ilinniarfeqalernissaa samminiarpaa
Demokraatiniit Inatsisartunut qinigassanngortittup Nuka Bisgaardip nunatsinni pilersitsisinnaanermut ilinniarfeqalernissaa sulissutigiumavaa.
- Isumatuunik inuusuttorpassuaqarpoq nunatsinni ilinniarfissaqannginertik pillugu Danmarkiliartariaqartartunik. Nunatsinni ilinniarnissamut periarfissat iliuuseqarfigeqataaffigerusupakka, Nuka Bisgaard Sermitsiaq.AG-mut oqarpoq.
Qineqqusaarnermini ilinniartitaaneq aallarnisaasuunerlu, suliffeqarfinni meeqqallu atuarfiani nakkarsaasarnerup pinaveersaartinnissaa sulissutigerusuppai kiisalu meeqqat atuarfiani ilinniartitsineq iluarsiivigerusullugu.
Nuka Bisgaardip aamma namminersortunngorusuttut pisortanit siunnersorneqartarnissaat qineqqusaarutigai, aammalu meeqqanut sammisaqartitsivimmik pilersitserusulluni.
Læs "Nuka Bisgaard går ind i politik"
Politikimik misilittagakinneq
Nuka Bisgaard oqaluttuarpoq killilimmik naalakkersuinermik sulinermik misilittaqarluni isumaqarlunili qineqqusaarnermi peqataaneq nuannerlunilu pissanganartuusoq.
- Politikimik misilittagaqartorsuunngilanga Gay Prideli pilersitseqataaffigisimavara, ilaatigut anguteqatigiit arnaqatigilluunniit katissinneerannut meerarsiartaarsinnaanerannulllu tunngasut politikkertaqartut suleqataaffigalugit.
- Politikkikkut suliniutunik allanik ilisimasaqartorsuunngilanga ullorli naallugu parteeqatinnit paasissutissinneqartuartarlunga suliniutit angisuut aatsitassallu pillugit, taamaalillunga politik pillugu ilisimasaqarlualerlunga, Nuka Bisgaard oqaluttuarpoq.
Nalligineqarusunngilanga
Erseqqissarpaa kræftertuunini atoqariaatsinilu pillugit nalligineqarluni Inatsisartunut qinerneqarnissani kissaatiginagu.
- Danmarkimi kemortissimanera peqqutigalugu qinerneqarnissara sianiilliornerussaaq, imaluunniit anguteqateqartuunera peqqutigalugu. Politik pillugu qinerneqarusuppunga, Nuka Bisgaard unneqqarilluni oqarpoq kissaatigaalu inuiaqatigiinni anguteqatigiit arnaqatigiilluunnii aappariittarnerat pillugu annertuumik ilisimasaqartoqarnerunissaa.