D: Nakorsat piffissartik napparsimasunut atortariaqarpaat
Napparsimasimanermut uppernarsaatinik nakorsat suliaqartarnerat Demokraatit Inatsisartuni qaqinniarpaat.
Nuummi nakorsaaneq Jesper S. Olesen AG-mut kingullermut oqaaseqarpoq Nuup nakorsiartarfiani nakorsat ingasagilersimagaat piffissarusjussuaq sulisinnaannginnermut uppernarsaatinut immersuinermut atortaramikku. Piffissartik inunnut napparsimasunut atorusunneruaat.
Demokraatit isumaq tapersersorpaat tuaviortumillu peqqissutsimut ataatsimiititaliami eqqartorneqarnissaa kissaatigalugu.
- Nalunngisatitut peqqinnissaqarfik ullutsinni assut ilungersunartumik ingerlavoq. Ajoraluartumik inuiaqatigiit pigisamikkut amigartunik atugassaqartitsigamik peqqinnissaqarfik piumasatsitut ingerlasinnaanngilaq. Taamaammat demokraatit nuannaarutigaat napparsimaveqarfimmi sulisut namminneq oqariartuutigimmassuk qanoq iliornikkut pitsaanermik ingerlasoqarsinnaanersoq – imaluunniit qanoq ililluni aningaasanik piffissamillu atuilluarnerusinnaanerlutik, Astrid Fleischer Rex allappoq.