svingdørspolitik
D: Soraarsitsiortortoqalerpoq
Naalakkersuisoqarfimmi pisortap tunuarnera Demokraatit atorpaat Siumumik saassusseqqinnerminnut
- Siumup sulisunik taarsersuinermik politikkini aallarteqqippaa. Sulisut piginnaanillit anisillugit, partiiip sakkutuuinik ilumoortunik, immaqali naleqqutinngitsunik taarserlugit. Taamatut oqarluni Inatsisartunut ilaasortap Demokraatineersup Palle Christiansenip Siumut saassuteqqippaa.
Sisamanngormat saqqummiunneqarpoq Aningasaqarnermut nunallu iluani pissutsinut Naalakkersuisoqarfimmi pisortaq Jan H. Lynge-Pedersen, ingerlaannavik atulersumik ´isumaqatigiissuteqaqatigiinnikkullu´ atorfimminit tunuartoq. Naalakkersuisoqarfimmilu sulisut tunuarnermut tunuliaqutaasoq pillugu oqaaseqarumanngillat.
– Tamanna uannit isigalugu ajuusaarnartorujussuuvoq, tassami naalakkersuisoqarfimmi pisortaasimasoq ilisimagakku sulilluartutut, piginnaasaqarluartutut partiimilu politikkimik isiginninniarani Kalaallit Nunaata ulluinnarni - siunissamilu - aningaaasaqarnera aalajaatrsuutinniarlugu atasinnaatinniarlugulu, Palle Christiansen tusagassiorfinnut nalunaarummini allappoq.
- Piffissami aggersumi nunami pisortani atorfiit qaffasinnersaat, tassa Namminersorlutik Oqartussani naalakkersuisoqarfimmi pisortatut atorfiit, nutaanik inuttalersorneqassapput. Qangatut ilisimaneqarluartumik Siumumeersunik atorfinitsitsiortortoqassava, imaluunniit naalakkersuisooqatigiit nutaat periuseq nutaaq atussavaa piginnaasat kisiviisa aallaavigalugit atorfinitsitsisarlutik, uagut naalakkersuisooqatigiinnitsinni eqqussimasarput?, politikeri Demokraatineersoq aperivoq.
Jan H. Lynge-Pedersen pillugu allaaserisaq atuaruk "Pisortaaneq tunuarpoq"
Steffen Ulrich-Lynge pillugu allaaserisaq atuaruk "Pisortaaneq nammineerluni tunuarpoq"
´Sulisunik taarsersuinermik politikki´ saassuppaa
Palle Christiansen oqarpoq atorfinitsitsinernik ataasiakkaanik nalinginnaasumik politikkimit akuleruttarani.
- Pisimiasumili matumani siusinnerusukkut naalakkersuisuusimasuni aningaasaqarnermut Naalakkersuisuusimavunga. Nuannaarutigalugu maanna naalakkersusioqarfimmi pisortaasimasoq qanimut, pikkorissutut sulilluartutullu suleqatigisimavara, tamanit nersorineqartarsimasoq. Nersornartutut oqaatigiinnarsinnaavara, taamaattumillu tunuarnera isigaara Siumut siusinnerusutut tusaamanerlutamik sulisunik taarsersuinermik politikkini nutaamik aallarteqqikkaa, Palle Christiansen allappoq.
- Ersissutigaara siulittuutigalugulu sulisut taarserarneqalissasut. Sulisut piginnaanillit, naalakersuisooqatigiinnut nutaanut pisarissersuutaasinnaasut peersillugit, inunnik, siusinnerusukkut qullerpaamit naalakkiisoqaraangat anngaaginnartartunik, taarserlugit.
- Illua'tungiliuttutut qanoq iliuuseqarpallaarsinnaanngilagut, inuppassuilli ilagissavaannga akerliuniarlutik suaartartartut. Taamaasiortassaanga Siumut sulisunik aqussinnaasaminik atorfinitsitsigaangat, Palle Christiansen tikkuaavoq.