Danmarkimi atisanik katersineq: Narsami nuannaarutaavoq
Ilinniartitsisoq soraarneq Peter Larsen Narsami pisariaqartitsisunut atisanik agguaasseqqippoq.
Aappariit soraarnerit Vordingborgimi najugaqartut, Anni aamma Steffen Bentsen, ukiut arfineq marlussaa ataannartumik kingumut meeqqat atisaannik Narsami agguaassassanik katersipput, atisat katersukkat taakku anaananut kisimiittunut, angajoqqaanut suliffissaaleqisunut, siusinaartumik sulisinnaajunnaarnersiutilinnut aammalu SIK malillugu akunnermusiakinnerpaanut agguaanneqartarput.
Tallimanngornermi arfininngornermilu Narsami innuttaasut illuanni, siusinnerusukkut STI-p atuarfigisimasaani agguaanneqarput.
Atisanik agguaassineq ilaqutariinnut aningaasaqarnikkut periarfissaluttunut assut nuannaarutaapput. Ilanngui oqarput inuit ajunngitsuusimassasut atisanik katerseriarlutik avannaarsuanut nassiussisartut. Allaat inunnut ilisimasarinngikkaluaminnut ungasissorsuarmilu najugaqartunut iluaqutissanngorlugit iliuuseqartarmata.
Suliffissarsiortoq anaanaq kisimiittoq, Naja-Nuka Cortzen, assut nuannaarpoq taamatut oqilisaanneqarnerminnut:
- Atorfissaqarteqaagut taamaammat atorluarneqassapput, taanna oqarpoq inunnullu suleqatigiinnermikkut atisanik katersillutillu agguaassinermik suleqatigiittut assut qujamasuuteqarluni.
Karsit 26-it atisanik ulikkaartut
Siuliani oqaatigineqareersutut soraarnerit aappariit Vordingborgimeersut, Anni aamma Steffen Bentsen, atisanik katersisuupput, anaananut ikiuiniaqatigiiffik mødrehjælpen, aammalu ilaquttatik ikinngutitillu suleqatigalugit. Assartuinermik suliffeqafiup Palles Fragt-ip siusinnerusutulli kingumut aningaasaliiffigai Vordingborgimiit Aarhusimut assartorneqarnissaat piviusunngortillugu.
Narsami Peter Larsen atisanik katersorneqarsimasunik nassiussarsivoq. Tassunga apuupput karsit 26-it meeqqat atisarpassuanik imallit, aammali taakku akornanniipput pinnguat meeqqanut nuannaarutaaqisut.
Sunngiffimmik sammisassaqartitsinermik suliaqartut aammalu ilaqutariit illuat ikiuupput atisat aariaannanngorlugit piareersarneqarnerini aammalu nerrivinni atisat torersuutinneqarnerat isumagalugu.
Atisat agguaassinermi inuttassarsissunneqanngitsut ilaqutariit illuannut tunniunneqarput siunissami meeqqat atisaatigut oqilisaassutaasussaassallutik.