oqaluffiit
Danmarkimi kalaallinik palaseqartarneq ilagiinnit sulissutigineqarpoq
Peqatigiiffik Kalaallit ilagiit Danmarkimi ataatsimeersuarnermini arfininngorneq 28. januar 2018 Kalaalllit Illuutaanni København-imi, nutaanillu siulersuisutaarpoq
Danmarkimi Kalaallit Ilagiit suliassarpassuaqarput.
Peqatigiiffik januaarip 28-ani Kalaallit Illuanni Københavnimi ataatsimeersuarmat nutaamik siulersuisutaarpoq.
- Kalaallit ilagiit Danmarkimi palasiisa amerlineqarnissaat suliniutigineqarnera pingaarnerutinneqarpoq kiisalu Kalaallit Ilagiit Danmarkimiittut Sinniisussaqalernissaat pingaatinneqarlunittaaq, peqatigiiffik tusagassiutinut nalunaaruteqarpoq.
Suliniarnermut tamatumunnga politikerit folketingimiittut Aarhus Stiftimi biskoppi taassumallu domprovstia P.H. Bartholin allagaqartarnikkut ataatsimeeqatiginninnikkullu ingerlanneqarnerat unikaallannatik ingerlateqqinniarpaat.
Anguniagaat suli tassunga killinngillat.
- Suliaq annertooq unammillernartoqaqisorlu siulersuisunngortut nukissaqarluarlutik ingerlatiqissavaat. Kissaatiginarporlu ilagiit kalaalillit Danmarkimi sumi tamani najugallit peqatigiiffiup uummaarilluni ingerlanneqarnissaanut peqataalluarnissaat ilaasortanngornermikkut suleqataaffigiumaaraat.
- Amerlaqaagut oqaatsivut atorlugit naalagiarsinnaanermut periarfissaqarusuttut, tarnikkut anniaatinik ikiorneqarnissamut, katitinneqarnissamut, ilisinernut allarpassuillu palasit suliarisartagaannut atorfissaqartitsisut. Taamaattumik siulersuisunngortut stift-ini kalaallisut naalagiarfiusartuni peqataajartortarnermikkut suleqatiginnikkusunneq ilagiinni, palasitsinnut kiisalu sogn-it oqaluffimminnik illuutiminnillu uagutsinnut atukkiisartut qaninnerusumik suleqatigiissaat pingaartillugu.
Siulersuisunngortut:
Charlotte Nebel Pedersen, Aarhus, siulittaasoq
Helga Maqe Nielsen, Guldbjerg Fyn, siulittaasup tullia
Bitha Metelmann, Lolland, aningaaserisoq
Stine E. Frandsen, Als, allatsi
Poul Kristian Johansen, Tappernøje, siulersuisunut ilaasortaq
Adolf Petersen, Brønderslev, sinn. siulleq
Mette Kleist, København, sinn. tullia