Danmarkimi nakorsaammik allagartalerlugu pisassamik pisinnaatitaavutit
Innuttaasut Kalaallit Nunaanni najugaqartut Danmarkimiikkallarnerminnut atatillugu nakorsaatinik allagartalinnik pisinnaatitaapput. Taama peqqissutsimut ministeri Sophie Løhde, IA-mi politikerimut Aaja Chemnitzimut akissuteqarnermini, naqissusiivoq.
Nakorsaatit nakorsamit Kalaallit Nunaannit allagartalerneqarnikut Danmarkimi nakorsaataarniarfimmi pisinnaavatit, nakorsaq Danmarkimiittoq akuersissuteqarpat, taama ilisimatitsivoq Danmarkimi nakorsaatinik nakkutilliisoqarfik.
- Nakorsaq EU-mi/EØS-imi nunamit allamit akuersissummik peqarpat, Danmarkimi najoqqutassiaq malillugu nakorsaataarniarfiit aamma nakorsaatinik tunniussisussaapput (…), aalajangersakkami allannguutit atuutsinneqarpata. Nakorsaatinik immikkut nakkutigineqartartunik, ilaatigut ikiaroornartunik pinngitsuuisinnaajunnaarsitsisartunillu, Danmarkimi akuersissuteqanngitsunit allagartalerneqarnikunik nakorsaataarniarfiit tunniussisinnaanngillat, akissummi tamanna atuarneqarsinnaavoq, nangillunilu:
Nakorsaatitigut allagartaq
- Nakorsaatit taakkua eqqunngitsumik tunniunneqarnissaat aarlerinarunnaarsarniarlugu, nakorsaatitigut allagartaq elektroniskiusoq (FMK) atorlugu nakorsaatit tunniunneqarsinnaapput, nakorsaq akuersissummik Danmarkimi atuuttumik peqarpat.
Innuttaasut Kalaallit Nunaanni najugaqartut Danmarkimi peqqinnissaqarfimmut saaffiginnittarsinnaasut, Danmarkimiikkallarnerminnilu nakorsat naliliineri tunngavigalugit katsorsarneqarsinnaasut, peqqissutsimut ministerip ilanngullugu ilisimatitsissutigaa.
- Innuttaasut qallunaatut CPR-normoqanngitsut FMK-online aqqutigalugu CPR-normumut taarsiullugu sanaanneqarsinnaapput, taannalu nakorsaatissanik allattuinermi atorneqarsinnaavoq, Sophie Løhde oqarpoq.