Danmarkimit eqqaaniutit
Gloslundemi palasip illorsuanit Juuntaamut eqqaaniutit.
Bente Tokholm Thomsenip Rødbymeersup eqqaaniutit uku allappai:
Juuntaaq toquvoq - Jonathan Jakob Jørgen Otto Motzfeldt 72-iinnarnik ukioqalerpoq. Maqaasissaqaara, tassami ilisarisimalerpara 21-inik ukioqarluni Glosunde Præstegårdimi meeraaffinnut kasuttormat. Tamanna pivoq 1960-imi, Juuntaaq Kalaallt Nunaanni ilinniartitsisutut ilinnigaqarnerminut atatillugu praktikkeriarmat. Taamanikkut qitiusumik atuarfimmi nutaamiikkusussimavoq, Dannelude Skolemi, piffissallu ilaani tassani atuartitsivoq.
Juuntaalli Københavns Universitetimi teologitut atuarusuppoq taamaattumillu Glosundemi palasi aperalugu ilagiilerinermi latiinerisullu ilinniartissinnaaneraani. Palasi tassaasimavoq ataataga, Anders Melgaard Kjær, taakkualu marluullutik nuannisartarsimaqaat. Juuntaat sukkasuumik ilaqutariinnut ilannguppoq misigisimalluni maani Danmarkimi ataatartaarsimalluni, anaanartaarsimalluni pingasunillu qatanngutertaarsimalluni.
Angajoqqaamma gæstebog-ianni takusinnaavara Juuntaaq 30/9 1960-imi Gloslunde Præstegårdimi Kalente-meeqataasimasoq. Aamma juullikkunnit inuulluaqqussuterpassuaqarpoq titartagaqarlunilu, nuliani Margit ilisaritillugu - kingornalu panini Karen aammalu tikeraartarnerpassuarminit inuulluaqqussutai.
1961-imi Fynimi Korupimut nuuppugut, angajoqqaammalu toqoreernerisa kingorna mannalu tikillugu Kalaallit Nunaata Danmarkillu akornanni attaveqaqatigiittarsimavugut. 1998-imi Bogensemi Koldingimilu tamatta nerersuaqatigisimavarput.
Kingullermik Juuntaaq naapisimaarparput 2008-mi, maaniimmat qatanngutiga Bodil Fynimiittoq katitsikkiartormagu.
Juuntaaq inuk qanilaarlunilu asannittuusimavoq, qiimasoq periataallaqqissorlu, eqqarsartaatsimigut tatiginartoq eqeersimaartortlu. Anguniagalik sulilluartorlu.
Eqqarsaatigilaariaruk: 1958-imi Juuntaaq ikinngummi atugaanut allattuiffimmut apeqqummut ima akisimammat (issuagaq uannga: "Jonathan Motzfeldtip 25. september 1988-imi 50-iliinerani nalliuttorsiornermi allakkat"):
Palasinngorniassaanga.
Kissaatiginerpaarsara - politikerersuanngornissara.
Aap, Juuntaamut sorpassuit eqquussimapput - sivisunerusumik inuuinnartussaagaluarpoq.
Juullernissaanut qilanaaraluarpunga, ukiorpassuarnili siullermeersumik Kalaallit Nunaannit Juuntaamit juullimi allagarsissanngilanga!