Danmarkip arfanniarnissamik siunnersuut taparserpaa
Siunnersuummi nutaami arferit aningisuut piniagaaqqilissapput. Avatangiisinik illersuiniaqatigiit tamanna mianernartutut taavaat.
Arferit angisuut 1986-imiilli niuerniutigalugu piniarnissaat inerteqqutaalersimavoq. Taamaakkaluartut arfinerit taakku pisarineqartarnerat marluroaatinngorsimavoq.
Tassunga peqqutaavoq nunarsuaq tamakkerlugu arfanniarnissamik ataatsimiititaliarsuup IWC-p ullumi siunenrsuut saqqummiummagu, ukiuni qulini tulliuttuni arferit taakku killilimmik piniarneqarnissaat ammaanneqassasoq.
Qallunaat ima isumaqarput, tunngaviatigut taanna isuma pitsaasuusoq. IWC ukiorpassuarni soriarsinnaasimanngilaq, nunat suliniaqatigiiffimmi ilaasortaasut avissaartuussimammata, ilaat niuerneriutigalugu arfanniarnermik akerliunatik, ilaasalu arferit angisuut eqqissisimatitaanissaat kissaatigalugu, Politiken allappoq.
Taassuma inerneraa Japan, Norge aamma Island arfarniartarlutik - IWC ilaasortaaffigisartik qanoq isumaqarnera soqutiginagu. Aamma nunat arlallit assigalugit Danmarkimi ernummatigineqarpoq, IWC-p isasoornissaa, illuatungeriit siunnersuut ataatsimoortoq akuerisinnaanngippassuk.
Taamaassappat nunarsuarmioqatigiit arfanniarnermut sunniuteqarsinnaajunnaassapput, nunanut allanut ministereqarfimmi siunnersortaaseq Ole Samsing IWC-mi Danmarkip aallartitaa isumaqarpoq.
- Arlaatigut ingammik Japanimiut soqutigisaannik nassaarsinnaanngikkutta ernummatigaara ukiut marlussuit ingerlaneranni anissasut. Arlallit aamma malinninniarnissaat ilimanarpoq. Taamaassappat nunarsuup immikkoortuini suliniaqatigiiffieqalissaaq Japan, Korea kujalleq allallut, taava nunarsuarmioqatigiit sunniuteqarsinnaajunnaassapput. Taava taamaallaat nunat aallartitaqarfiinut naammagittaalliorsinnaalissaagut, Ole Samsing oqarpoq.
Avatangiisinik illersuiniaqatigiit qallunaat taama isumaqarnerat isornartorsiorpaat isumaqarlutik mianernartiisoq.
- Maannakkut matu ammalaarniarneqarpoq, taavami ukiut qulit qaangiuppatta susoqassava? Piumasoqarnerup annikilliartornera peqqutigalugu suliffissuaqarfik taanna nungulerpoq. Taama siunnersuuteqarnikkut taakku anersaartuutilerneqassapput, havbiologi Hanne Lyng Wintheri Greenpeace Nordenimi paasisitsiniaanermi pisortaq oqarpoq.
Danmark IWC-mi Savalimmiut nunarpullu aamma sinnerlugit peataavoq. Nunat taakkumarluk peqatigalugit qallunaat tamatut isummerput. Siunenrsuut nutaaq pillugu IWC-p tullissaa ukimoortumik ataatsimiinnerani Marokkomi juunip 21-aniit 25-anut pisussami oqallittoqassaaq.