Danmarkip mittarfiliortiternissamut akuliunniarnera kamaatigineqartoq
Danmarkip naalagaaffia mittarfiliassanut nutaanut aningaasaliissuteqarpat tamanna nunasiaateqarnertut paasineqarsinnaassaaq, Sisimiuni Siumup siulittaasua, Dorthea Isaksen oqarpoq
Siumup Sisimiuni immikkoortortaqarfia Danmarkip naalagaaffiata nunatsinni mittarfiliortiternissanut akuliuteratarsinnaaneranik isorinnittorujussuuvoq.
AAMMA ATUARUK:
Mittarfiliornissanut atatillugu Lars Løkke millionilikkaanik aningaasaliiniartoq
Dorthea Isaksen isumaqarpoq, tamanna Kalaallit Nunaata namminiilivinnissaanut Danmarkip piareersimannginneranut takussutissaasoq.
Ilangeeqataarusuttut
KNR naapertorlugu tusagassiorfinnut nalunaarummi taanna ima allappoq:
- Tamatumami ersersippaa qanoq danskit nunarput pisuussutaalu iluatigitigineraat ilangeeqataaffigerusutsigineraallu, inuiaallu naqisimaneqartuarnissaat qulakkeerniartigigaat.
Lars Løkke Rasmussen ataasinngorpat Nuummut tikissaaq Kim Kielsen ataatsimeeqatigiartorlugu, naatsorsuutigineqarporlu Danmarkip naalagaaffiata mittarfiliortiterissanut arlaatigut annertussusilimmik akuulernissaa isumaqatigiissutigineqassasoq, immaqa piginneqataasutut qularnaveeqqusiisutullu.
Nunap tunniussinnaasai
Immikkoortortaqarfimmit partiip siulittaasua Naalakkersuisullu siulittaasua Kim Kielsen isorineqartorujussuuvoq.
- Siumup politikkeraa inuiaat nammineersut nunami tunniussinnaasai akisussaassuseqartumik atorlugit ineriartortut imminnut napatissinnaalerlutillu aqussinnaalersimasut. Tamannali kattuffiup puigorluinnarsimagunarpaa, KNR naapertorlugu isornartorsiuineq taama nipeqarpoq.