Danskit aningaasanut inatsisissaat: 120 mio. kr.-it Kalaallit Nunaannut Savalimmiunullu
Danskit 2024-mut aningaasanut inatsisissaat saqqummiunneqaqqammerpoq, Nunanullu Avannarlernut aningaasaliissutinit ukiuni sisamani tulliuttuni 120 mio. kr.-it avinneqarput. Aggulussinerit uani takukkit.
Danskit aningaasaqarnermut ministeriata Nicolai Wammenip 2024-mut aningaasanut inatsisissaq saqqummiuteqqammerpaa, taassumalu 2024-p ingerlanerani Kalaallit Nunaanni Savalimmiunilu suliniutinut assigiinngitsunut 30 mio. kr.-it qulakkeerpai.
Aningaasat amerlassuseqataat ukiunut pingasunut tulliuttunut immikkoortinneqarput, taamaattumik Kalaallit Nunaannut Savalimmiunullu tapiiffiginninnerit katillugit 120 mio. kr.-iupput.
Folketingimut ilaasortaasut IA-meersup Aaja Chemnitzip Siumumeersullu Aki-Matildap aningaasanut inatsisissamut isumaqatigiissut nuannaarutigaat.
Kalaallit Nunaannit ilaasortat namminerisaminnik suliniutinut assigiinngitsunut millioninik aggulussinermut sunniuteqaqataapput.
Aki-Matilda Høegh-Dam aningaasanut inatsisissaq pillugu ima oqaaseqarpoq:
- Isumaqatiginninniarnerni arlalinnik piumasaqarnikuuvunga, taamaattumik angusarput nuannaarutigaara. Eqqartuussivimmi pitsaanerusumik Kalaallit Inuit atugaqarnissaat, pitsaanerusumik aningaasarsiaqarnissaq kiisalu pitsaanerusumik atorfeqarnissamut pisinnaatitaaffeqarput, kiisalu inuusuttortatta pitsaanerusumik atugaqarnissaat aamma anguniarnikuuarput.
- Tamakku anguneqarnissaannut isumaqatiginninniaqataanikuuvugut. Kulturitta oqaatsittalu pingaartinneqarnissaat aamma salliutinnikuuarput. Aningaasanut inatsimmut angusagut ataqatigiipput, Siumup anersaava malillugu anguneqarlutik.
Suliniutit toqqissisimalersitsisut
Aaja Chemnitz aningaasanut inatsisissaq pillugu ima oqaaseqarpoq:
- ”Ataatsimut isigalugu naammagisimaarpara, 52,5 mio. kr. suliniutinut innuttaasut kalaallit
malugisinnaasassaannut qularnaarnissaat iluatsikkatsigit.
- Immikkut nuannaarutigaara Inuit Pisinnaatitaaffii pillugit Institutip aamma Naalagaaffiit Peqatigiit immikkut nalunaartartuata nalunaarusiaat pilertortumik qisuarifigisinnaagatsigit, ajornartorsiutit kalaallinit misigineqartartut ilaat tassuunaakkut illuatungilersinnaajumaallugit. Tamatuma saniatigut nuannaarutigivara suliniutinut toqqissisimanermik pilersitsissutaasussanut aningaasaliisoqarnissaa qularnaaratsigu,
taamatullu Nunatsinni eqqartuussiveqarnermut pitsanngorsaataasussanik qularnaarilluta,”