Demokraatit aaqqissuusseqqinnermik suliaqarnermut sakkortuumik isornartorsiuineranut Erik Jensen akerliliivoq
Naalakkersuisut aaqqissuusseqqinnernut pingaarutilinnut tunngatillugu iliuuseqanngitsut, illuatungiliuttut Demokraatit isumaqarput. Naalakkersuisup Erik Jensenip isornartorsiuineq ingattarsernerarlugulu sulinerup ingerlaneranut innersuussivoq.
Aningaasanut inatsisissatut siunnersuut tallimanngormat sapaatip-akunnerata siuliani aappassaaneerneqarmat, Inatsisartuni ilaasortat akornanni isumaqatigiinngitsoqarpoq, tassani Naalakkersuisut aaqqissuusseqqinnissamik siumut nalunaarutigineqartunut suliniuteqarnerat Demokraatit sakkortuumik isornartorsiorpaat.
Akileraartarnermut aaqqissuusseqqinneq kiisalu ineqarneq pillugu aaqqissuusseqqinneq, Namminersorlutik Oqartussat inaataanni aserfallattaaliuinissamik kinguussaaqqaneq annertusiartuinnartoq, aaqqissuuteqqitassat allat peqatigalugit iluatsinneq ajuleqqapput:
- Aalisarnermut inatsisissaq aamma kinguartinneqareerpoq. Akileraartarnermut aaqqissuusseqqiineq uninngavoq, qaqugulu akileraartarnermut aaqqissuusseqqiineq piviusunngussanersoq ilimananngilluinnarluni. Naalakkersuisut inissiaatileqatigiinnut naalliuttunut tapiissutissatut 5 millioner koruuningajannik immikkoortitsisimapput, tamaaliornerullu ersersippaa, uani 2023-imi ineqarnermut aaqqissuusseqqinnermik takujunnanngitsugut. Tamannalumi aamma suli isumaqatiginninniutigineqanngilaq.
Nielsen: Pitsaanngilluinnarpoq
- Taavalu ilinniartitaanermut aaqqissuusseqqiineq isertuussaq, Naalakkersuisut Siulittaasuata ammaalluni oqalugiarnermini eqqaasaa. Taannalu aamma SULI isumaqatiginninniutigineqarsimanngilaq. Tamanna pitsaanngilluinnarpoq, Jens-Frederik Nielsen oqarpoq.
Aappassaaneerneqalernerani Naalakkersuisut allannguutissatut siunnersuummik saqqummiussaqarput, tassani aningaasartuutit 35 mio. kr.-t, akileraartarnermut aaqqissuusseqqinnissamut immikkoortinneqartut peerneqarput. Aningaasat taakku 2025-mut nuunneqarput.
Tamatuma saniatigut Naalakkersuisut aamma 4,8 mio. kr.-nik inissiaqarfinnut pisariaqartitsilluinnartunut aningaasaliissutinik kissaateqarput, Namminersorlutik Oqartussat inissianut attartortagaanut iluarsartuussinissamut kinguaattooqqanermut angummanniarnissamut pilersaarut akuerisaanngitsoq tunngavilersuutigalugu.
Isornartorsiuineq ilumuunnginneraraa
Oqallinnermi IA-mi oqaaseqartartup Asii Chemnitz Narupip aamma Siumumeersup Karl Tobiassenip, ukiumi ingerlasumi akileraartarnermut aaqqissuusseqqinnermik suliaqarnissaq angumerineqassasoq neriuutigalugu oqaatigaat.
Aningaasaqarnermut naalakkersuisup, Erik Jensenip (S), Demokraatinit isornartorsiuineq Sermitsiaq.AG-mut ingasattajaarnerarlugu oqaatigaa, Naalakkersuisullu iliuuseqannginnerarneqarnerat ilumuunnginnerarlugu:
- Tamanna ilumuunnginerarsinnaavara. Naalakkersuisut assigiinngitsunik aaqqissuusseqqinnernik suliaqarlutik ilungersorput, Erik Jensen oqarpoq.
Erik Jensenip oqarnera naapertorlugu akileraartarnermut aaqqissuusseqqinnermik suliaqarneq ingerlavoq, kisianni taanna kinguaattoorpoq, partii akileraarutinik appaanissamik kissaateqarnerat pissutigalugu, taakkunanilu periarfissat misissorneqarput:
- Partiit ilaat akileraarutinik appaanissamut kissaateqarput, aningaasartalissagutsigit periarfissanik allanik nassaartariaqarpugut. Piumasariinnarneqarnissaa naammanngilaq, akileraarutillu apparneqarnerinut aningaasaliinernut peqataanani, Erik Jensen oqarpoq.
Aalisarnermut inatsit tusarniutigineqalersoq
Ineqarneq pillugu aaqqissuusseqqinnissamut suliaqarnermut tunngatillugu Erik Jensen, partiit aasaanerani inatsimmi ineqarneq pillugu suliassaqarfimmi aaqqissuusseqqinnermut atatillugu suut naleqqussarneqarnissaannut pilersaarut pissarsiaraat:
- Piffissaq pillugu pilersaaruteqarpoq, tamarmillu partiit oqaloqatigineqarnerisigut ingerlapput, Erik Jensen oqarpoq. Annertuumik kinguussaaqqasoqarneranut tunngatillugu, Erik Jensenip oqarnera naapertorlugu aaqqissuusseqqinnerup immikkoortuani aappaani, suli suliarineqartumi saaffiginnittoqassaaq.
Ilinniartitaaneq pillugu aaqqissuusseqqinnermik suliaqarneq naalakkersuisoqarfinni susassaqartuni ingerlasoq, Erik Jensenip aamma oqaatigaa, naggataatigullu aalisarnermut inatsisissatut siunnersuut tusarniutigineqarsinnaanngulernerarpaa:
- Suliarpassuupput, taamaattumik Demokraatinit isornartorsiuineq ingasattajaarpoq. Naalakkersuisut ilungersorlutik sulipput, Erik Jensen oqarpoq.