Demokraatit ajuusaanngillat
Demokraatit Nuummi taaguunneqarluaqaat, qinersinerulli inernera naammaannarinarpoq. Taamaattoq partiip siulittaasua ajuusaanngilaq. Ilinniarfigisimaqaarput, maannalu Inatsisartunut kommunenullu qinersinissat ilungersuuteqarfiginiarlugit, Per Berthelsen oqarpoq.
Folketingimut iseritaqarnissarput sorsuutigilluarsimavarput, kisianni pissarsiarinngilarput, taamaattoq qinersinermi tassani misilittagarpassuarnik pissarsisimavugut, ajuusarutissaqaratalu. Taamak oqarpoq Demokraatit siulittaasuat inatsisartuni ilaasortaq Per Berthelsen.
– Ilumoorpoq, qineqqusaarnermi peqataaniaraanni taava tamaviaarluni pisariaqarpoq. Kisianni uagutsinnut Folketingi pingaarnerit pingajoriuarsimavaat. Inatsisartunut qinersinissanut kommunenullu qinersinissanut angusarissaarnissarput pingaarnerutipparput, aammalu folketingimut qinersinermi pitsaanerusumik angusaqarnissaq kissaatigisimagaluarlutigu inernera siulittuutitut taarusuppara, tassa inatsisartunut kommunenullu qinersinissani ajunngitsumik angusaqarumaarnissatsinnut, Per Berthelsen Sermitsiaq.gl-imut oqarpoq.
Partiip siulittaasuata erseqqissarpaa, qineqqusaarneq partiimut nutaajusumut assut ilinniarfiusimasoq, qineqqusaarnerullu uppernarsarpaa partiip aaqqissuussaanera ajunngitsumik ingerlasoq.
– Ukiut ikittuinnaat piureerpugut, kisianni politikkikkut aaqqissuussaanikkullu misilittakkat ilumut malunnaateqarlualernissamut pisariaqartut angulerpagut. Taamaattumik qinersinerup inerneranut ajusaaruteqarnissatsinnut sumilluunniit peqqutissaqanngilagut, Per Berthelsen oqarpoq.