Demokraatit: Charlotte Ludvigsen tunuartariaqarpoq

Kommuneqarfik Sermersuumi kommunalbestyrelset suleqatigiinnerat pitsaasuugaluarpoq. Taamaattoq Demokraatit kommunalbestyrelsemi issiasuutitai marluusut Charlotte Ludvigsen tatigiunnaaramikku borgmesteriunerminit tunuaqqulerpaat. Tamassumunnga tunngavilersuutigineqarpoq tulleriittunik kukkusunik aalajangertarsimaneq, Sermersuumi Demokraatit tusagassiorfinnut nalunaaruteqarlutik allapput.

- Taamaattumik Demokraatit Kommuneqarfik Sermersuumiit kaammattuutigissavarput Charlotte Ludvigsen atuuffimminiit tunuassasoq, Demokraatit allapput.

Justus Hansen Sermitsiaq.AG-mut nassuiaavoq tatiginninnginnermut tunngaviusoq borgmesterip allaffissornikkut aalajangernerini, kommunalbestyrelsep peqataaffigisinnaanngisaani, aalajangertarnera kukkuneqartarpallaartoq.

- Soorunami politikkikkut aalajangiinerit kommunalbestyrelsemi ataatsimoorluta suliarisarpagut, kisiannili borgmesteri allaffissornermi aalajangernissamik akisussaaffeqarpoq, tassanilu kommunalbestyrelse allaffissornermut tunngasunik imaaliallaannaq takunnissinnaanngilaq. Borgmesteri allaffissornermi politikkimilu sulinermi tamani malinnaasussaavoq. Taamaattumik Charlotte Ludvigsen borgmesteritut tatigiunnaarparput, aalajangertarnermini kukkusaqattaarsimammat, Justus Hansen Sermitsiaq.AG-mut oqarpoq.

Ininik attartortitsisarnermut suliaq oqimaalluinnartoq

Demokraatit tusagassiorfinnut nalunaarutiminni nassuiaatigaat kommunit nakkutilliisoqarfianit kommunip ininik attartortitsisarneranut suleriusaa sakkortuumik isornartorsiorneqarsimasoq. Tamannalu borgmesterip tunuarnissaata kaammattorneqarnissaanut tunngavissaalluinnartoq.

- Suli ilisimasagut annertusiartorput. Kisianni nalujunnaarparput, Borgmesteri pappiaqqanut atsiugassarinngisaminut atsiorsimasoq, tamatumanilu eqqunngitsuliortoqarneranut saarlerpaatut akisussaalersimasoq. Aalajangersaaneq tamanna kukkuneruvoq, demokrati aqqani nunamilu inatsi tunngavigalugu ingerlasumi kinguneqartitsinissaq inissaminiippoq, Sermersuumi Demokraatit allapput.

Demokraatit isumaqarput "atorfilittanut akisussaaffik miloriunnera pissusissamisuunngitsoq".

Sermitsiaq.AG-p Charlotte Ludvigsen oqaaseqartinniarsimagaluarpaa iluatsinnaguli.

Suleqatigiilluarneq ingerlatiinnarusukkaat

Borgmesteri ukiaq manna akiuussusertinnissamut tunuleriaattuut qaangiinnarlugit akiuussusertippoq. Tassani Demokraatit namminneerlutik nalunaaruteqarput borgmesteri suli tatigalugu. Tatiginninnerli maannamut killeqartoq, Kommuneqarfik Sermersuumi 1. viceborgmester, Justus Hansen isumaqarpoq.

Inuit Ataqatigiit, Demokraatit aamma Naleraq qinigaaffimmi matumani kommunemi suleqatigiissallutik atsioqatigiissimapput. Inuit Ataqatigiit qulingiluanik, Demokraatit marlunnik aammalu Naleraq marlunnik issiasuutitaqarlutik. Siumut suleqatigiinnissamut isumaqatigiissummut peqataanngilaq, arfinilinnilli ilaasortaatitaqarluni. Charlotte Ludvigsen borgmesteritut tunuassappat Kommuneqarfik Sermersuumi kommunalbestyrelsep affaanit tapersersorneqartumik nutaamik borgmesterimik ivertitsisoqassaaq.

- Borgmesteritsinnut erseqqissarparput suleqatigiinneq pitsaasoq ingerlatiinnarusullugu. Kisiannili borgmesteri maanna issiasoq tatigiunnaarparput Justus Hansen oqarpoq.