upernaakkut ataatsimiinneq
Demokraatit: Isumaginninnermut ukiumut 5 million koruunit illuartinneqartariaqarput
Randi V. Evaldsen aamma Justus Hansen Inatsisartuni siunnersuuteqarput Naalakkersuisut immikkut iliuuseqarnissamut aningaasaliisassasut
Ikiuunnissarput Tasiilap pisariaqartippaa. Ikiunissamut periarfissaqarutta ikiuiniaratali taava uagut ajornartorsiutip ilagissavaatigut, Inartsisartuni ilaasortat Randi V. Evaldsen aamma Justus Hansen (D) siunnersuumminni tunngavilersuipput.
Upernaakkut ataatsimiinnermut siunnersuutit 185-t
Inatsisartut upernaakkut ataatsimiinnissaanni apriilip 20-ani 2017-imi aallartittussami pilersaarutit naammassilerput. Ataatsimiinnermi siunnersuutit 185-init amerlanerusut suliarineqassapput. Taakku ilagaat Demokraatinit siunnersuut Tunumi illoqarfimmit aallaaveqartoq.
- Tasiilaq naapertuutinngitsumik isumaginninnikkut ajornartorsiutinik eqqugaasimavoq, aaqqiissutissallu ilaat tassaasinnaavoq ataatsikkut annertuumik tunaartaqarluartumillu iliuuseqarneq taamaallaat kommuniumiunngitsoq aammali Namminersorlutik Oqartussanit, Randi V. Evaldsen oqarpoq.
Imminut toquttartut amerlanerpaasut
Siorna Namminersorlutik Oqartussat nakkutillinerminni nalunaarusiaa naapertorlugu illoqarfimmi meeqqat 1.000-it affaasa missaat isumaginninnermi nalunaarsorsimapput, Tasiilamilu inuttussusermut naleqqiullugu imminut toquttartut amerlanerpaapput.
Politiit ukiumoortumik 2014-imut nalunaarusiaani angerlarsimaffinni eqqissiviilliornerit nalunaarutigineqartut amerlanerpaat tulleraat Nuummit arfineq pingasoriaammik amerlanerusunik inoqartumit taamaallaat qaangerneqarlutik. 2015-imi Tasiilami pinngitsaaliilluni atoqateqarnerit nalunaarutigineqartut 13-iupput, taamaallaat Qaqortumi Nuummilu nalunaarutigineqartunit amerlanerullutik.
Suliffissaaleqineq aamma annertoqaaq, nunatsinnitamarmi qaffasinnerpaat pingajoralugu.
- Tassaaginnarput isumaginnikkut ajornartorsiutit annertuut ilaat illoqarfimmi tatineqaataasut, siunnersuuteqartut oqarput. Naalakkersuisullu ukioq taanna § 37 naapertorlugu apeqqutit ilaannut akissutaanni nassuerutigineqarpoq Namminersorlutik Oqartussat Tasiilami immikkut ittumik iliuuseqarnissaat pissusissamisooqtoq, siunnersuuteqartut oqarput.
Saniatigut aningaasaliisoqassaaq
Taamaattumik siunnersuutigaat Naalakkersuisut 2018-imut ukiunullu naatsorsuusiorfiusunut tamanut aningaasanut inatsisissatut siunnersuumminni 5 million koruunit arlalitsigut iliuuseqarnissamut atugassatut, taamaalilluni isumaginninnikkut pissutsit malunnaatilimmik pitsanngoriarnissaat qulakkeerneqarluni, tamannalu Kommuneqarfik Sermersooq qanimut ataqatigiissaareqarigalugu ingerlaneqassalluni.
Allaaserisaq tamaat Sermitsiami atuaruk, taanna uani ataani linki aqqutigalugu akiliillutit iserfigisinnaavat: