Demokraatit: Jonathan Motzfeldt tunuarit
– Soorunami Demokraatit eqqartuussisoqarneq sulianik isumaginnitsissavaa. Pinngitsuutinneqassagaluarpalluunniilli paasisat saqqummersimasut Inatsisartut siulittaasuannut ataqqinarpaluttuunngillat, Jens B. Frederiksen Demokraatit sinnerlugit allappoq.
– Maanna tusagassiuutitigut saqqummerpoq Inatsisartut siulittaasuat, Jonathan Motzfeldt, Inatsisartut allattoqarfiani sulisumit kinguaassiornermut tunngasumik napertuilluanngitsuliorsimasutut unnerluutigineqarsimasoq.
– Demokraatit inatsisartuni ilaasortaq, Jonathan Motzfeldt, Inatsisartut siulittaasussaattut tapersersuillutik taasinikuunngillat inummut inuiaat suliassaataasa akimanersaannut sukkulluunniit isumaginnittussamut piumasaqaateqaratta erseqqaarilluinnartunik.
– Demokraatit siulittaasumut piumasaqaataat saneqqunneqarsinnaanngitsut ilaatigut tassaapput ileqqorissaarnissamut isuma pitsaasoq, iluasaarneq, putumajuitsuuneq aammalu nunap killeqarfiisa iluanni aammalumi avammut Inatsisartut ataqqinartumik kiinnertartuattut sulisinnaasoq, Jens B. Frederiksen allappoq nangillunilu:
– Jonathan Motzfeldt september 2007-imi ataani atsiortumut utoqqatsertariaqarsimavoq Inatsisartut ammaanersiorneranni pisortatigoortumik katersuunnermi putumatilluni pissusilersornini pissutigalugu.
– Maanna kingumut ajortulioqqissimavoq. Kisianni maanna siornatigut pisarsimasuninngarnit nalunnginneqartunit ilungersunarnerungaartumik pissusilimmik unnerluutigineqarluni. Keermiaasiit putumatilluni pisimasoq.
– Soorunami Demokraatit eqqartuussisoqarneq sulianik isumaginnitsissavaa. Pinngitsuutinneqassagaluarpalluunniilli paasisat saqqummersimasut Inatsisartut siulittaasuannut ataqqinarpaluttuunngillat.
– Taamaattumik allaqqunneqarsinnaanngilaq, Jonathan Motzfeldt Inatsisartut siulittaasuattut aammalu inatsisartuni inigisaminit tunuartariaqarpoq, Demokraatit isumaqarput.