qinersineq
Demokraatit: ‘Kiffaanngissuseq pisussaaffiliivoq’
‘Kiffaanngissuseq pisussaaffiliivoq’. Tassaavoq Demokraatit qineqqusaarnermi uani qitiutillugu oqariartuutiginiagaat
Demokraatit siulittaasuata, Andreas Uldumip, Demokraatit Inatsisartunut qinersinissamut qineqqusaarutissaat qineqqusaartitassaallu Demokraatit allaffianni Namminersorlutik Oqartussat allattoqarfianni marlunngornermi saqqummiuppai.
- Demokraatit upperilluinnarput sapinngisamik annertunerpaamik kiffaanngissuseqarneq inummut pitsaanerpaajuaannartoq. Nammineq inuunerisap ilusilersornissaanut kiffaanngissuseqarneq. Nammineq aningaasaatit sumut atornissaannut kiffaanngissuseqarneq. Sumi najugaqarnissamut kiffaanngissuseqarneq. Ilinniakkamik toqqaanissamut kiffaanngissuseqarneq. Allarpassuarnullumi kiffaanngissuseqarneq, Demokraatit siulittaasuat, Andreas Uldum, partiip qineqqusaarutissai marlunngornermi saqqummiukkamigit ilaatigut taama oqarpoq.
Atuaruk: Aajuku Demokraatit qinigassanngortitaat
Kiffaanngissuseq akisussaaffimmik malitseqarpoq - kiffaanngissuserlu pisussaaffiliivoq
Demokraatit isumaqarput immitsinnut qanigisatsinnullu akisussaaffimmik tigusinissatsinnut tamatta pikkorinnerulertariaqarpugut. Angajoqqaat meeqqamik toqqissisimanartumik pitsaasumillu angerlarsimaffeqarnissaat akisussaaffigaat. Meeqqat qasuersimallutik nerilluarsimallutillu atuariartortarnissaat aamma angajoqqaat akisussaaffigaat. Kiisalu meeqqat ilinniakkerisimanissaat pissuserissaarnissaminnillu atuartitsisuminnullu ataqqinninnissaminnik ilisimasaqarnissaat angajoqqaat aamma akisussaaffigaat.
- Pissusiviusut oqaatigissallugit Demokraatini toqqarparput, piviusorlu tassaavoq akissaqarpallaannginnatta.
- Aalajangiisartutut aningaasat atugassarititaasut atornissaannut kiffaanngissuseqarpugut. Kiffaanngissuserlu taanna pisussaaffiliivoq, Demokraatit siulittaasuat, Andreas Uldum, partiip qineqqusaarutissai marlunngornermi saqqummiukkamigit taama oqarpoq.