Demokraatit: Naalakkersuisut innuttaasut sumiginnarpaat
Coronaqarnerani pissutsit pillugit Naalakkersuisut attaveqarnerat erseqqinngilluinnarpoq. Inatsisit nutaat kingusinaarlutik saqqummiunneqartarput, tamannalu innuttaasuni toqqissimannginnermik pilersitsisarpoq, Demokraatit taama isumaqarput.
Naalakkersuisut kingullermik 12. november corona pillugu tusagassiortunik katersortitsipput. Taamanernilli arlaleriarluni ullormut kisitsisinik nutarterisoqarnerani 100-nit amerlanerusut tunillatsittarput, Upernavik novembarip 23-anni 81-inik tunillatsittoqarsimammat sakkortuumik killilersuiffigineqarpoq.
Qasigiannguani aamma annertuumik tuniluuttoqarpoq, tassanilu Naalakkersuisut pisut pillugit oqalugiaateqanngillat, tamannalu pitsaanngilluinnarpoq, Demokraatinit Inatsisartunut ilaasortaq, Anna Wangenheim oqarpoq.
- Paasissutissanik ingerlatitseqqittarnerup aaqqissuussaannginnera amigaatigaara, allannguinermi ersarissumik attaveqarnikkut toqqissisimanermik eqqoriaruminartumik pilersitsinermut taarsiullugu pakatsinermik toqqissisimannginnermillu pilersitsisoqarmat, Anna Wangenheim Sermitsiaq.AG-mut oqarpoq.
Toqqissisimanngitsitsisut
Kingullermik nuna tamakkerlugu nalunaarutinik pingasunik nutaanik sapaammi unnukkut nalunaaruteqartoqarpoq, unnuap qeqqanut atulertussanik.
- Isumaqarpunga kingusinnerpaamik tallimanngormat tusagassiuutinut nalunaaruteqartoqarlunilu tusagassiortunik katersortitsisoqartariaqaraluartoq, tassami nalunaarut unnuap qeqqanut atulersinneqarpoq.
Attaveqarnerup amigaataanera aamma kingusissukkut nalunaaruteqartarneq inuiaqatigiinnut kinguneqartartoq, Demokraatineersup oqaatigaa.
- Innuttaasorpassuit pisortat suliffeqarfii namminersortullu iliuuserineqartunut nutaanut piareersimanatik suliartorput.
Naalakkersuisoqatigiit apriilimi sulinerminnik aallartitsigamilli, killilersuinerit atulersinneqaleraangata partiit siulittaasui tamarmik tusarniaavigineqartarnerat ileqquuvoq. Maanna taamaattoqanngilaq, Jens-Frederik Nielsen ilisimatitsivoq.
Killilersuinerit nutaat pillugit illuatungaannaanut nalunaaruteqartarneq
Aqqalu Jerimissen killilersuinerit nutaat pillugit oqarasuaatikkut paasitinneqarpoq, kisianni aalajangiinernut peqataatinneqanngilaq.
Erik Jensen aamma sapaatip-akunnerata siuliani sianerfigineqarpoq, tassani killilersuinerit sorliit atulissanersut oqaaatigineqarpoq, kisianni paasissutissiineruvoq oqaloqatigiinneruallaanngitsoq, taanna Sermitsiaq.AG-mut oqaluttuarpoq.
Naalakkersuisut piffissami kingullermi coronamik ajornartorsiornerup ineriartornerani ersarinngippallaarnerannik, Demokraatit isornartorsiuinerannik tapersiivoq, tamannalu pisariaqanngitsumik innuttaasunik toqqissisimannginnermik pilersitsinerarlugu.
Sermitsiaq.AG novembarip 22-annili coronaqarnerani pissutsit pillugit Naalakkersuisunik apersuiniarsarivoq. Tamanna ullumi ataasinngornermi 6. december iluatsippoq.