Demokraatit oqaluttuarisaanermi nutaaliorput
Simon Simonsen aamma Karen Marie Kyed Frederiksen sivisuumik eqqarsartariaqarsimanngillat Demokraatinut ilanngunnissaminnut aalajangernissap tungaanut. Demokraatit Kommune Kujallermi qinersinermi kingullermi sassartitaqanngitsut, manna pingasorpassuarnik ilaasortaatitaqalerput.
Qaqutigoortorujussuuvoq partii qinersinermut sassartitaqanngitsoq, taamaalillunilu inissanik pissarsinikuunngitsoq, qinersinerup ingerlanerani siuariartornermigut pingasunik qinikkanik issiatitaqalersinnaanera. Tamannali maanna Demokraatit tanngassimaarutigisinnaalerpaat.
Tassami marlunngornermi 6. april 2021-mi Kommune Kujallermi kommunalbestyrelsimut Demokraatit sassartitaqanngillat.
Maannali qinersineq suli naanngitsoq partii qinikkanit 15-iusunit pingasunik ilaasortaatitaqalerpoq.
- Demokraatiniit ilaasortartaavut tikilluaqqungaarpagut. Isertuutissanngilaralu tanngassimaarlungalu tulluusimaarutigigakku partiitsinnut anguniakkatsinnullu soqutiginninnerup annertusiartornera, maannalu nukittuumik inissisimanernermik kinguneqartalermat assut nuannaarpunga, partiip siulittaasua, Jens-Frederik Nielsen Sermitsiaq.AG-mut oqarpoq.
Margrethe Thaarup Andersen aallarniutaavoq
Marts 2023-mi, tassa ukioq ataaseq matuma siorna, Margrethe Thaarup Andersen aalajangerpoq Siumut qimassallugu Demokraatinullu ilanngutissalluni.
Juni 2023-mi Kommune Kujallermi partii siuttuuusoq IA Demokraatillu aalajangerput suleqatigiilissallutik, suleqatigiinnerlu taanna suli ingerlavoq, taamaalillutillu partiit taakku marluk issiavinnit 15-iusuniit aqqanillit inuttaqartilerpaat.
Siumut siornatigut Kujataani angissutsimigut pallitassaaarpiarneq ajortoq, maanna Simon Simonsenip Karen Marie Kyed Frederiksenillu Demokraatinut nuunnerisigut sisamaannarnik ilaasortaatitaqalerpoq, taakkunannga ataaseq Atassummit nuunnerulluni.
- Partiitut annertusiartornerput aallartippoq Margrethe Thaarup Andersen partiitsinnut ilaasortanngussalluni aalajangermat. Taanna aammalu Kujataani immikkoortortaqarfipput assut sulilluarput, pingaartumik innuttaasut atugaasa pitsanngorsarneqarnissaat aammalu inuussutissarsiutinik ingerlataqartut periarfissaasa annertusarneqarnissaannik sulissutiginnilluarput. Sulilluarnerat maana partiitta anguniagaanik paasinnilluarnermik kinguneqaleriartorpoq, tassami oqaatigilluaannarlugu siornatigut Demokraatit paqumiginineqartutut inissisimasimagaluarlutik maanna pitsaasumik patajaatsumillu ineriartortoqalernikuuvoq, misigisimavugullu politikkikkut naleqartitavut anguniakkavullu paasineqarlualeriartuinnartut, Demokraatit siulittaasuat Jens-Frederik Nielsen tulluusimaarluni oqarpoq.
Simonsen: Siumut siunnerfeqanngilaq aqunneqaranilu
Simon Simonsen politikkimik sulinermini inuusuttuullunili partiimik Siumumik tamaviaarluni sullisseqataanikuuvoq. Kujataani sassartaleramili qinerneqarluartartunut ilaajuaannartuuvoq. Taamatuttaaq Inatsisartuni Naalakkersuisunilu Siumut sinnerlugu sulinikuulluni.
Taassuma isertuarani oqaatigaa Siumumiiginnarnissani isumaarussimasoq, isumaqarnerarporlu Siumut siunnerfeqanngitsoq aqunneqaranilu:
- Ukiuni kingullerni Siumut siunnerfeqannginnera aqunneqarneratalu amigarnera ersarilliartuinnarsimavoq. IA-mut aqutaassallutik aaliangersimavaat ullormiillu ullormut politikkerneq ingerlatilerlugu. Tamanna isumaqatiginngisaannarnikuuara. Piffissaq ungasinnerusoq isigalugu inuiaqatigiillu qanoq ineriartortinneqassanersut ersarissumik isummerfigineqartarnissaa pingaartitaraara. Matumanilu siunnerfeqanngippallaarneq pilersaaruteqannginnerlu peqqutigalugit Kommune Kujallermi nunalu tamakkerlugu ineriartorneq kigaappallaalersoraara. Nunamilu maani asaqisanni siunissarput pillugu Demokraatit ersarinnerpaanik pitsaanerpaanillu isummersortut isigaakka, Simon Simonsen oqarpoq.
Karen Marie Kyed Frederiksen: Meeqqat atugaasa pitsanngorsarneqarnissaat salliussaaq
Simon Simonsen ukiorpassuarni politikkikkut sulereersoq misilittagaqarluartuusorlu, Karen Marie Kyed Frederiksen politikkimi nutaqqanut ilaavoq, taassumami qinikkatut sulinera siullermeerutaavoq, sassaramilu siullermeeraluarluni qinersisartunit ilassineqarluarpoq.
Oqartoqarsinnaagaluarpoq politikkimi nutaajusoq, kisianni timersornerup silarsuaani taanna ilisimaneqarluartuuvoq, aammalu meeqqat atugaasa pitsanngorsarneqarnissaannik tamaviaarutiginnittuunini ersersilluartarpaa:
- Meeqqat siunissaraagut, pitsaasunillu ulluunerani paaqqinnittarfiit, meeqqat atuarfii aammalu sunngiffimmi susassaqartitsinermi atugassarititat sinaakkuteqarnissaat qulakkiissallugu qinikkatut akisussaaffigaarput. Kommuunerisatsinni meeqqat atugassarititaat sallersaatinneqarnissaat pingaarnersiorneqassasut pingaartipparput. Taassumap avataasigut timersornerulernissamut periarfissat pitsaanerulernissaat kommuunimiit qulakkeertariaqaripput isumaqarpugut. Innuttaasutut ataasiakkaatut aqatigiinnerulernissatsinnut timersorneq aqqutissatsialaavoq, inuunerinnerulernissamut nuannaarnerulernissamullu aqqutissatsialaat, Demokraatinut noorlaat Karen Marie Kyed Frederiksen aamma Simon Simonsen isumaqatigiillutik naqissusiipput.