Demokraatit: Qinersisitsiniaritsi
Partiip naalakkersuisut qaqisinngitsoortutut karakterilerpai
– Demokraatit tatiginngilaat maanna naalakkersuisuusut Kalaallit Nunaat aqussinnaagaat.
Taamatut oqarpoq partiip siuilttaasua Per Berthelsen, Inatsisartut ammaanersiorlutik oqallinneranni.
– Taamaattumik Demokraatit sakkortunerpaamik naalakkersuisut siulittaasuat Hans Enoksen, Siumut, kajumissaassavaat inatsisartunut qinersinissaq nalunaarutigeqqullugu, taamaasilluni innuttaasut Inatsisartuniik nutaanik naalakkersuisunillu nutaanik pilersitsiniassammata.
Ilinniartitsisutoqqap Per Berthelsenip Siumut/Atassummi naalakkersuisooqatigiinni naalakkersuisut ataasiakkaat karaterilerpai - ersarilluinnartumik qaqisinngitsoortillugit.
Demokraatit naapertorlugit Hans Enoksen inuuvoq ilakkuminartoq ajunngitsorlu, piffissami namminersornermik, kommuninik aaqqissuusseqqinnermik aatsitassanillu piiaanermik unammilligassalerujussuarmi Kalaallit Nunaannik aqutsisinnaanngilluinnartoq.
Naalakkersuisunut ilaasortaq Tommy Marø, Siumut, Demokraatit ajornerpaamik nalilerpaat, tassaanerarlugu "Kalaallit Nunaata oqaluttuarisaanerani qularnanngilluinnartumik naalakkersuisunut ilaasortat ittuuallannarnersaattut qularnarnersaatullu".
Tommy Marø tusagassiorfinnit sammineqalerpoq ukiup aallartinnerani seqinnerajuttumut Hawaii-mut angalammat meeqqerivinnik paasisassarsiorluni.
– Oqarusussinnaavugut Kalaallit Nunaannut pitsaanerpaassasoq Tommy Marø nunani allaniinnerulaarnerusartuuppat, taava Kalaallit Nunaannik ikinnerusunik ajoqusiisassagaluarpoq, Per Berthelsen oqarpoq.