DF: Akkarip atorfinitsinneqarnera Foghip naasuiartariaqarpaa

Martin Henriksenip DF-imeersup imamiusuimasup Ahmed Akkarip Kalaallit Nunaanni meeqqat atuarfianni imaaliallaannaq ilinniartitsisunngorsinnaanera assut tupigusuutigaa.

Akkari ukiualuit matuma siornagut Århusimi Lykkeskolen-imi nukappiaqqamik 11-nik ukiulimmik annersitsisimanini pissutigalugu persuttaasimasunut pineqaatissinneqarsimavoq. Tamanna tunngavigalugu Martin Henriksenip ernumanartoqartippaa, Akkari-mik atorfinitsitsinerup Kalaallit Nunaanni ilinniartitaanikut ingerlatseriaaseq ajornartorsiuteqareersoq suli ajornerulersisannginneraa.

- Narsap Kommuneata ilinniartitsisoq atuartumik 11-inik ukiulimmik persuttaasimalluni eqqartuussivimmi pineqaatissinneqarsimasoq atorfinitsissinnaammagu annilaarutigaara. Inummik Muhammedimik ajornartorsiulernerup nalaani Danmarkimik taamalu aamma Naalagaaffeqatigiiffimmik tunussisumut aammalu politikerimik demokratii tunngavigalugu qinigaasimasumik sioorasaarisimasup, aammalu imamitut sulinermini ingasattajaarniat pingaartitaannik soorlu arnat naqisimanearnissaannik demokratiimullu sorsunnissamik suliniutiginnittunik tapersersuisuusumik meeqqanut inuusuttunullu sullissisussanngortitsisinnaaneq akerleraara, Martin Henriksen oqarpoq. Taassuma aamma piumasaraa statsminister Abders Fogh Rasmussenip (V) Kalaallit Nunaanni Namminersornerullutik Oqartussanit naasuiaanneqarnissani piumasarissagaa.

Jyllands-Posten naapertorlugu Akkarimik atorfinitsitsineq aamma kalaallit nunaanni tusagassiorfiit aqqutigalugit sakkortuumik oqallitsitsilersimavoq.

Akkari atuartumik attuisimasutut pineqaatissinneqarsimasoq Kalaallit Nunaanni ilinniartitsisutut sulisinnaanersoq pissusissamisoornersoq arlaata apeqquserpaa. Oqalliseqataasut ilaata Ahmed Akkari Muhammedimik ajornartorsiornerup nalaani pingaarutilimmik inissisimasimasoq quiassuaatigaat.

Ahmed Akkari sermitsiaq.gl-imut ammasumik allakkamini erseqqissarpaa, nammineq Kalaallit Nunaannut qimaannginnami aammalu nunamut tikinnera taamak aalassatsitsigimmat tupigusuutigigini.

Akkarip kalaallit nunaanni pinngortitaq innuttaalu nersualaarpai, aammalu nammineq "isumanerluuteqarani, pillagaasimanani siusinnerusukkullu suliffigisimasaminit pitsaasumik allaaserineqarluni." Kalaallit Nunaannnut tikilluni.